InfoHub Logo

الماتىدا ق ر ۇلتتىق كىتاپحاناسىندا جەڭىس كۇنىنە وراي «ونەگەلى ءومىر» سەرياسىنان «باۋىرجان مومىش ۇلى» تۋرالى جاڭا كىتاپتىڭ تۇساۋى كەسىلدى.

جاڭا باسىلىم «باۋىرجان مومىش ۇلىنىڭ مۇراسى» قوعامدىق قورى مەن ءال-فارابي اتىنداعى قازاق ۇلتتىق ۋنيۆەرسيتەتىنىڭ ىقپالىمەن باسىلىپ شىقتى.

عىلىمي ەڭبەكتە باتىردىڭ عىلىمي اينالىمعا ەنگىزىلگەن ءومىربايانى، مۇراعات قۇجاتتارى، «ۇشقان ۇيا» عۇمىرباياندىق رومانىنان جاس ۇرپاققا تاعىلىم  بولارلىق ءۇزىندى، الۋان ءتۇرلى تانىس تا بەيتانىس فوتوسۋرەتتەر، ەڭ باستىسى بۇرىن ەش جەردە جاريالانباعان ەستەلىكتەر مەن جازبالار توپتاستىرىلىپ وتىر.

«عالىمدار ايتادى، سونگەن جۇلدىزدىڭ جارىعى ميلليون جىلدارعا جەتەدى دەپ. 30 جىل وتسە دە اتامىزدىڭ اتى اتالماعان كۇن جوق. سەبەبى، ول حالىقتىڭ جۇرەگىندە، زەردەسىندە بولدى. بۇگىنگى تۇساۋى كەسىلىپ وتىرعان كىتاپ اتاعا دەگەن ءىلتيپاتتىڭ ءبىر بولىگى دەپ ويلايمىن. مەن ءوزىم وقىعان، ۇلىم ەرجان وقىعان ۋنيۆەرسيتەت قابىرعاسىندا جاسالىپ جاتقان يگىلىكتى ءىس ۇزاعىنان بولسىن. وقىرمانى كوپ بولسىن. مەن جازۋشى، اقىن ەمەسپىن. جاي قاراپايىم كەلىنمىن. ءبىر جاعىنان كىمگە كىم كەلىن بولماي جاتىر. ءبىر جەردە اپا، ءبىر جەردە زاكە دەپ قۇرمەتتەسە، وسىنىڭ بارلىعى اتانىڭ قۇرمەتىنىڭ ارقاسى. اتاسىنىڭ كەبىسىنە اياق سۇقپايتىن، ەنەسىنىڭ توسەگىنە وتىرمايتىن كەلىن بولدىم. جاراتقان يەم اتامنىڭ قولىنا سۋ قۇيىپ، شاي قايناتىپ بەرۋگە مۇمكىندىك تۋعىزدى. مەنى اتاق-داڭق، ماراپاتتان قۇداي ساقتاپتى. تەك ماڭدايىما جازىلعان اتاق  باۋكەڭنىڭ كەلىنى دەگەن ءسوز. اتاما قىزمەت ەتكەن از عانا عۇمىر مەن ءۇشىن ۇلكەن اكادەميا بولدى»، - دەدى باۋكەڭنىڭ كەلىنى زەينەپ احمەتوۆا.

وتىرىس بارىسىندا جينالعان زيالى قاۋىم وكىلدەرى وزدەرىنىڭ ومىرلەرىندە باۋىرجان مومىشۇلىمەن ءبىر ساتتىك كەزدەسۋلەرىن ەستەلىك رەتىندە ايتىپ بەردى.

---