InfoHub Logo

2018-جىلى 13-ماۋسىمدا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ قوعامدا ۇلتتىق مادەنيەت پەن  تاريحتى قايتا جاڭعىرتۋ يدەياسىنىڭ توڭىرەگىندە شىلدە ايىنىڭ ءبىرىنشى جەكسەنبىسىن «ۇلتتىق دومبىرا كۇنى» دەپ جاريالادى. بۇل مەرەكەنىڭ   ۇلتتىق رۋحانياتىمىزعا قوسار ۇلەسى مول. ۇلتتىق دومبىرا مەيرامى كۇنتىزبەگە قىزىل بولىپ ەنگىزىلەننەن باستاپ، ءتۇرلى ءىس-شارالار  ۇيىمداستىرىلىپ، جىل سايىن ءداستۇرلى تۇردە تويلانۋدا. ايتا كەتسەك، 2018-جىلى شىمكەنت قالاسىندا مىڭعا جۋىق ونەرپاز ءبىر مەزەتتە كۇي  ورىنداپ، بي بيلەدى. ۇلتتىق مۋزىكالىق اسپاپتار كورمەسى ۇيىمداستىرىلىپ، كورەرمەندەرگە كادەسىيلار ۇسىنىلدى. مەرەكە قالالىق  كىتاپحانالاردا جالعاسىن تاپتى.

2019-جىلى شىمكەنت قالاسىندا بيىكتىگى 7مەتردى قۇرايتىن ءتۇرلى ويۋلارمەن كومكەرىلگەن الىپ دومبىرانىڭ ەسكەرتكىشى قويىلدى. ۇلتتىق  اسپابىمىزدىڭ اشىلۋ سالتاناتىندا قالا اكىمى: عابيدوللا ءابدىراحىموۆ پەن ايتىسكەر اقىن ءبىرجان بايتۋوۆ بوي كورسەتىپ، دومبىرانىڭ تاريحتاعى ءرولى مەن بۇگىنگى قوعامداعى ماڭىزى جايىندا ءتۇرلى ويلارىمەن ءبولىستى.

ايتۋلى مەرەكە بۇل جىلى دا ءوز دەڭگەيىندە اتاپ ءوتىلىپ جاتىر. وڭتۇستىك وڭىرىندەگى كەلەس اۋدانى كۇيشىلەرگە كەندە ەمەس ەكەنىن دالەلدەدى. سەبەبى كەلەس اۋدانى جاستار رەسۋرستىق ورتالىعى كممنىڭ ۇيىمداستىرۋىمەن «قازاعىمنىڭ ءۇنىسىڭ سەن دومبىرا» اتتى ءىس-شارا بولىپ ءوتتى. تاۋەلسىزدىكتىڭ 30 جىلدىق مەرەيتويى، شىلدەنىڭ العاشقى جەكسەنبىسى ۇلتتىق دومبىرا كۇنى سونىمەن قاتار كەلەس اۋدانىنا 3 جىل تولۋىنا  وراي 12 اۋىلدىق وكرۋگتىڭ دارىندى جاستارى اتالمىش ءىس-شارادا باس قوستى. وتىز كۇيشى ءوز ونەرىن ورتاعا سالدى. كۇي اتاسى قۇرمانعازى ساعىرباي ۇلىنىڭ: «بالبىراۋىن»، «اداي» تاعى دا تاريحي تۇلعالاردىڭ كوپتەگەن تۋىندىلارى ورىندالدى. جالپى سانى وتىزدان استام كۇي تارتىلىپ، تىڭدارمانعا ەرەكشە كوڭىل-كۇي سىيلادى. ايتۋلى كۇنى تاريحي بەتتەر قايتا اشىلىپ، ەلىمىزدە كۇيلەر قايتا جاڭعىردى. ۇلتتىق اسپاپتى ۇلىقتاۋ جاس ۇرپاق ءۇشىن پارىز. ۇلى دالامىزدى سوزبەن ەمەس سازبەن تەربەگەن دومبىرا ماڭگى جاساپ، ماڭگى جاڭعىرا بەرمەك.

ءابدىجاپپار مەرەي مۇسا قىزى

---