كاير قالاسىندا اباي ەسكەرتكىشى اشىلدى
13 قازاندا مىسىر اراب رەسپۋبليكاسىنىڭ استاناسى كاير قالاسىندا قازاقتىڭ ۇلى اقىنى ءارى ويشىلى اباي قۇنانبايۇلىنا ارنالعان ەسكەرتكىش-بيۋستىڭ سالتاناتتى اشىلۋ ءراسىمى ءوتتى، دەپ xابارلايدى قازاقپارات.
«اباي ەسكەرتكىشى كاير ورتالىعىنداعى ەڭ كورىكتى جەرلەردىڭ ءبىرى «ەركىندىك جانە دوستىق» ساياباعىنا قويىلدى.
شاراعا مىسىر اراب رەسپۋبليكاسى سىرتقى ىستەر، حالىقارالىق قاتىناستار جانە مادەنيەت مينيسترلىكتەرىنىڭ وكىلدەرى، ديپلوماتيالىق كورپۋستىڭ مۇشەلەرى، مىسىرلىق جەتەكشى ب ا ق جۋرناليستەرى، قوعام قايراتكەرلەرى، سونداي-اق، مىسىردا وقيتىن جانە تۇراتىن قازاقستاندىق ازاماتتار قاتىستى»، - دەلىنگەن قازاقستاننىڭ مىسىرداعى ەلشىلىگى تاراتقان xابارلامادا.
سالتاناتتى راسىمدە قازاقستاننىڭ مىسىرداعى ەلشىسى ءارى وسى يدەيانىڭ باستاماشىسى بولعان بەرىك ارىن، كاير گۋبەرناتورىنىڭ ورىنباسارى مۇحاممەد ايمان، سونداي-اق وسى ءىستىڭ دەمەۋشىسى جانە ءمۇسىن اۆتورى ءسوز سويلەدى.
ەلشى ءوز سوزىندە ابايدىڭ قازاق جانە الەمدىك ادەبيەتكە قوسقان ۇلەسىنە توقتالا كەلىپ، ونىڭ 150 جىلدىق مەرەيتويىنا وراي يۋنەسكو حالىقارالىق ۇيىمىنىڭ 1995 جىلدى «الەمدەگى اباي جىلى» دەپ جاريالاۋى اقىن تالانتى مەن ەڭبەگىنىڭ الەمدىك دەڭگەيدە مويىندالۋىنىڭ ناقتى ايعاعى ەكەندىگىن اتاپ ءوتتى. ال، قازاقستاننىڭ تاۋەلسىزدىگىنىڭ 25 جىلدىعىنا وراي ۇلى ويشىلعا ارنالعان ەسكەرتكىش-بيۋستىنىڭ ەلوردامەن باۋىرلاس كاير قالاسىندا قويىلۋى - ەكى ەل حالىقتارى اراسىنداعى كوپجىلدىق دوستىقتىڭ بەرىكتىگىن دالەلدەيدى، دەدى ول.
ءوز تاراپىنان كاير گۋبەرناتورىنىڭ ورىنباسارى «اباي ەسكەرتكىشىنىڭ مىسىر استاناسىنىڭ ورتالىعىندا اشىلۋى - ول مەگاپوليس ءۇشىن قازاق جانە مىسىر حالىقتارىنىڭ رۋحاني-مادەني جاقىندىعىن بىلدىرەتىن ايتۋلى وقيعا» دەپ اتاپ ءوتتى. ونىڭ ايتۋى بويىنشا كاير گۋبەرناتورلىعى ۇلى قازاق حالقىنىڭ پەرزەنتىنە ەسكەرتكىش ورناتۋ جايىنداعى يدەيانى قۋانا قارسى الىپ، ونىڭ جۇزەگە اسىرۋدا بارىنشا مۇمكىندىكتەر جاسادى. كەيىنىرەك ءسوز العاندار اباي شىعارمالارىنداعى گۋمانيستىك يدەيالاردىڭ وزەكتىلىگى بۇگىنگى كۇنى ارتا تۇسەتىندىگىن ايتتى.
شارا سوڭىندا مىسىردا وقيتىن قازاقستاندىق ستۋدەنتتەر اباي ليريكالىق ولەڭدەرىن ورىندادى. سونىمەن قاتار، قوناقتارعا اراب تىلىنە اۋدارىلعان ابايدىڭ «قارا سوزدەرى» مەن ولەڭدەر جيناعى سىيعا تارتىلدى.
وسى رەتتە، اتالعان ەسكەرتكىش-بيۋستىڭ كايردەگى ق ر ەلشىلىگىنىڭ قولداۋىمەن مىسىرلىق مەسەنات، قازاقستان مەن مىسىر دوستىعى قاۋىمداستىعىنىڭ مۇشەسى دوكتور حۋسەين ءال-شافييدىڭ قاراجاتىنا قويىلعاندىعىن، ال ءبيۋستىڭ اۆتورى قولتۋمالارى كايردەن باسقا ماسكەۋ، سانكت-پەتەربۋرگ، قازان جانە تاشكەنت قالالارىندا ورناتىلعان بەلگىلى مىسىرلىق سكۋلپتور ۋساما ال-سەرۋي بولعاندىعىن اتاپ ءوتۋ كەرەك.
1998 جىلدان بەرى مىسىرلىق كوشەلەردىڭ ءبىرى اباي اتىمەن اتالادى، ال ەلوردانىڭ ورتالىق كوشەلەرىنىڭ بىرىنە مىسىرلىق بەلگىلى جازۋشى جانە ادەبيەتتانۋشىسى تاحا حۋسەيننىڭ ەسىمى بەرىلگەن. بۇگىندە قازاقتىڭ ۇلى اقىنى ءارى اعارتۋشىسى ابايدىڭ ەسكەرتكىشتەرى ماسكەۋ، بەيجىڭ، تاشكەنت، ۆيتەبسك، تەگەران، ىستامبۇل جانە بۋداپەشتتە ورناتىلعان.
You Might Also Like
-
وبلىستىق بالالار اۋرۋحاناسىنا جەتكىزىلگەن جاسوسپىرىمگە وتا جاسالدى، دەپ حابارلادى «موي گورود». وقيعا بقو قازتالوۆ اۋدانىنداعى قاراوبا اۋىلىندا بولعان.
-
ول كىدىرىپ، قونجىقتارىنا ءبىر قارادى دا، كەيىن الدى-ارتىنا قاراماستان الەمدەگى ەڭ ۇلكەن وزەننىڭ ارعى بەتىنە ءجۇزىپ كەتتى.
