InfoHub Logo

وبلىستاعى ءۇش اۋىسىمدى مەكتەپتەردى جويۋ ماقساتىندا ماڭعىستاۋ وبلىسىنداعى ينۆەستيسيالىق جوبالار تىزىمىنە رەسپۋبليكالىق بيۋدجەت پەن 2017-2019 جىلدارداعى ۇلتتىق قوردىڭ ەسەبىنەن 5400 ورىندىق 8 مەكتەپتىڭ قۇرىلىسى قوسىلدى. ولاردىڭ قۇرىلىسىنا ارنالعان قارجى بولىنۋدە.

ۇلتتىق قوردان 3 مىڭ ورىندىق 4 مەكتەپتى سالۋعا قارجى قاراستىرىلدى. قاراجات جاڭاوزەن قالاسىنداعى 900 ورىندىق 2 ورتا مەكتەپ پەن مۇنايلى اۋدانىنىڭ ءتۇرلى اۋىلدارىنداعى: باسقۇدىق پەن قىزىلتوبە اۋىلىنداعى 600 ورىندىق 2 ورتا مەكتەپتىڭ قۇرىلىسىنا ارنالعان. اتالعان ەلدى مەكتەپتەردىڭ ءارقايسىسىندا تەك ءبىر مەكتەپتەن ورنالاسقان، ال ءبىلىم الىپ جاتقان وقۋشىلار سانى جوبالىق قۋاتتىلىقتان اسىپ تۇسكەن.

«باسقۇدىق اۋىلدىق وكرۋگىندە جوبالىق قۋاتتىلىعى 960 ورىندىق ءبىر مەكتەپ بار، الايدا ول مەكتەپتە 2 مىڭ 667 بالا ءبىلىم الۋدا (مەكتەپكە دەيىنگى بالالار سانى - 4127). سونىمەن قاتار باسقۇدىق اۋىلىنىڭ 1 مىڭ 460 وقۋشىسى اۋدانداعى ورتا مەكتەپتەردە وقىپ جاتىر، تاسىمالداۋ ۇيىمداستىرىلعان. قىزىلتوبەدە  جوبالىق قۋاتتىلىعى 960 ورىندىق ءبىر مەكتەپ بار، الايدا ول مەكتەپتە دە 3 مىڭ 12 بالا ءبىلىم نارىمەن سۋسىنداۋدا (مەكتەپكە دەيىنگى دايىندىق توپتارى بار). جاڭاوزەنگە توقتالىپ وتەتىن بولساق، ءبىر ورتا مەكتەپتىڭ ىرگەسى راحات مولتەكاۋدانىندا  قالانادى. اتالمىش تۇرعىن الابىندا جوبالىق قۋاتتىلىعى 960 ورىندىق ءبىر مەكتەپ بار، الايدا ول ءبىلىم وشاعىندا 3 مىڭ 103 بالا ءتالىم السا، ءۇشىنشى اۋىسىمدا 294 بالا وقىپ جاتىر. ءقازىر مەكتەبى جوق جاڭاوزەن قالاسىنداعى راحات شاعىناۋدانىندا   900 ورىندىق ورتا مەكتەپ سالىنادى. ازىرگە بۇل شاعىناۋداننىڭ بالالارى راحات اۋىلىنداعى №18 ورتا مەكتەپتە ءبىلىم الۋدا»، - دەپ اتاپ ءوتتى ماڭعىستاۋ وبلىستىق ءبىلىم باسقارماسى ەكونوميكا جانە بيۋدجەتتىك جوسپارلاۋ ءبولىمىنىڭ باسشىسى گۇلبانۋ قىزىلعۇلوۆا.

ونىڭ ايتۋىنشا، رەسپۋبليكالىق بيۋدجەتتەن مۇلدەم مەكتەبى جوق ەلدى مەكەندەردەگى 2400 بالاعا ارنالعان 4 مەكتەپتىڭ قۇرىلىسى ءۇشىن اقشا بولىنگەن. ياعني ماڭعىستاۋ اۋدانى شەتپە اۋىلىنىڭ اششىبۇلاق-2 مولتەكاۋدانىندا 600 ورىندىق جالپى ءبىلىم بەرەتىن مەكتەپ، قاراقيا اۋدانى اپپاق اۋىلى ەرالييەۆ تەمىرجول ستانساسىندا 300 ورىندىق ورتا مەكتەپ، جاڭاوزەن قالاسى اراي مولتەكاۋدانىندا 900 ورىندىق مەكتەپ جانە ءتۇپقاراعان اۋدانى سايىن شاپاعاتوۆ اۋىلىندا 600 ورىندىق مەكتەپ سالىنادى. 

---