InfoHub Logo

ق ر ىشكى ىستەر مينيسترلىگى اكىمشىلىك پوليسيا كوميتەتى ءتوراعاسىنىڭ ورىنباسارى رەنات زۇلقايىروۆ بالالار مەن جاسوسپىرىمدەردىڭ تاربيەسىنە كەرى اسەر ەتىپ جاتقان فيلمدەر مەن سەريالداردى اتادى.

«قوعامدا جاڭا سىن-قاتەرلەر مەن تالاپتار پايدا بولىپ جاتقانىن مويىنداۋىمىز كەرەك. ەرەسەكتەر نەگىزىنەن اقشا تابۋمەن باسى قاتىپ جۇرگەندە، بالا تاربيەسىنە ۋاقىت قالمايدى. بالالار تاۋلىك بويى ينتەرنەتتى، الەۋمەتتىك جەلىلەردى قاراپ وتىرادى. مۇندا ەڭ تانىمال كونتەنت رەتىندە ءبىرىنشى ورىنعا زورلىق-زومبىلىق، دورەكىلىك پەن ءتۇرلى پرانكتەر شىعىپ وتىر. سونىمەن قاتار، كەيىنگى كەزدەرى كامەلەتكە تولماعانداردىڭ مىنەز-قۇلقىنا «چەرنىي دۆور»، «پاسانسكايا يستوريا»، «تاراز»، «سلوۆو پاسانا» سياقتى تانىمال فيلمدەر كەرى اسەر ەتىپ جاتىر»، - دەدى ر. زۇلقايىروۆ سەناتتا كامەلەتكە تولماعانداردىڭ قۇقىقتارى مەن زاڭدى مۇددەلەرىنىڭ ساقتالۋىن قامتاماسىز ەتۋ ماسەلەسىن تالقىلاۋ كەزىندە.

بۇل تۇرعىدا ول پوليسيا قىزمەتكەرلەرى وقۋ-اعارتۋ مينيسترلىگىمەن بىرلەسە وتىرىپ، وسى فيلمدەر مەن سەريالداردىڭ كەيىپكەرلەرىن مىسالعا الىپ، قىلمىستىق ءومىردىڭ تەرىس سالدارىن ءتۇسىندىرىپ جاتقانىن ايتتى.

«ءبىراق بۇل ءىس-شارالار جەتكىلىكسىز. جەرگىلىكتى جەرلەردە يدەولوگيا جەتىسپەيدى، ەكراندا ۇلگى الاتىن كەيىپكەرلەر تاپشى»، – دەپ تولىقتىردى رەنات زۇلقايىروۆ.

بۇدان بۇرىن حابارلانعانداي، سەناتتا كامەلەتكە تولماعانداردىڭ قۇقىقتارى مەن زاڭدى مۇددەلەرىنىڭ ساقتالۋىن قامتاماسىز ەتۋ تاقىرىبىنداعى جيىندا دەپۋتات نۇرلان بەكنازاروۆ سوت ستاتيستيكاسى بالا تاربيەسىنە بايلانىستى ماسەلەلەردىڭ وتە وزەكتى ەكەنىن كورسەتىپ وتىرعانىن ايتتى.

---