قازاقستاندىق ستۋدەنت يلون ماسكتىڭ بايقاۋىندا ۇزدىكتەر قاتارىنان كورىندى
ۇلىبريتانياداعى ۋوريك ۋنيۆەرسيتەتىنىڭ ستۋدەنتى سانجار تايجان - زامانداستارىمەن بىرگە امەريكاندىق ميللياردەر يلون ماسكتىڭ حايپەرلۋپ (Hyperloop) بايقاۋىندا ۇزدىكتەردىڭ قاتارىنان تابىلدى.
سانجار تايجان الەمنىڭ وزىق وقۋ ورىندارىنىڭ ءبىرى ۋوريك ۋنيۆەرسيتەتىنىڭ 50 ۇزدىك ستۋدەنتى. قازاقستاندىق ستۋدەنت كەلەشەكتىڭ كولىگىن ويلاپ تابۋ ءۇشىن كوماندا جاساقتاعان. سەرىكتەستەرى قاتارىندا بولاشاق ينجەنەر، فيزيك جانە بيزنەسمەندەر بار. تۋعان ەلدەرىنىڭ گەوگرافياسى دا ءارقيلى: انگليا، يسپانيا، ينديا، اۆستريا، وڭتۇستىك كورەيا جانە باسقا دا مەملەكەتتەر.
«سانجاردىڭ جاۋاپكەرشىلىگىنىڭ جۇگى وتە اۋىر. ءارتۇرلى فاكۋلتەتتەردە ءبىلىم الىپ، وقۋ كەستەسى ءارقيلى بولعانىنا قاراماستان وتە كوپ ادامنىڭ باسىن قوسا ءبىلدى. ول سونداي-اق بيزنەس پەن يندۋستريا ءۇشىن نە كەرەك ەكەندىگىن جاقسى بىلەدى. ول كوماندا ءۇشىن وتە كوپ نارسە جاسادى»، - دەيدى Warwick Hyperloop جوباسىنىڭ قاتىسۋشىسى /وڭتۇستىك كورەيا/ حيانسوگ لي.
سانجاردىڭ كومانداسى ەنەرگيا ۇنەمدەگىش قابىلەتتىلىگى جانە جىلدامدىعى وتە جوعارى كاپسۋلا جاساپ جاتىر. ونىڭ كومەگىمەن جولاۋشىلار مەن جۇكتەردى دىبىس جىلدامدىعىمەن قۇبىر جەلىسى ارقىلى تاسىمالداۋعا مۇمكىندىك تۋماق.
كوماندا جوبالاعان كاپسۋلا ماگنيتتى ورىسكە نەگىزدەلەدى. ول ايگىلى يلون ماسككە تيەسىلى اەروعارىشتىق كومپانيادا سىناقتان وتەتىن بولادى. سانجاردىڭ جوباسى SpaceX Haperloop Pod Competition تۋرنيرىنە جولداما العان 1600 قاتىسۋشىنىڭ اراسىنان ۇزدىك 35 كوماندا قاتارىنان تابىلىپ وتىر.
«ءبىزدىڭ ۋنيۆەرسيتەتتە بىرنەشە ستۋدەنتتىك جوبا بار. ءبىراق بۇل عالامدىق جوبا بولعاندىقتان ستۋدەنتتەردىڭ نازارىن ەرەكشە اۋدارىپ وتىر. كەلەشەكتە ول جەڭىسكە جەتەدى دەگەن ۇمىتتەمىز. سانجاردىڭ جانە ونىڭ كومانداسىنىڭ الەمدەگى كىل مىقتىنىڭ ءبىرى بولاتىندىعىنا سەنەمىز»، - دەيدى WMG ەنەرگەتيكالىق يننوۆاسيالىق ورتالىقتىڭ باس ينجەنەرى مارك امور-سەگان.
وتكەن جىلى سانجاردىڭ باتارەيالاردىڭ توزۋىن بولجاۋ بويىنشا جەكە جوباسى انگلياداعى باكالاۆر ستۋدەنتتەر اراسىندا ۇزدىك يننوۆاسيا رەتىندە تانىلعان. وتكەن جازدا سانجار Jaguar Land Rover-دە تاعىلىمدامادان ءوتىپ، جۇمىسقا شاقىرۋ الدى. ءبىراق ول جەكە ستارتاپ جوباسىمەن اينالىسۋى مۇمكىن. سونداي-اق قازاقستاندىق يلون ماسك ءوز بولاشاعىن تۋعان جەرىمەن بايلانىستىرادى.
«يا، قازاقستانمەن بايلانىستىرامىن. ءبىراق الداعى 10 جىلدا ءوزىمدى تەحنيكالىق تۇرعىدا شىڭداپ، جوبالارىمدى دامىتقىم كەلەدى. مەنىڭ بولاشاعىم ەلدە ەكەندىگىنە ءۇمىتىم زور. ول جاقتا وتباسىممەن تۇرعىم كەلەدى. ويتكەنى بويىمدا قازاقتىڭ قانى بار جانە الدەبىر جوبانى قولعا العان كەزىمدە قازاقستانعا پايدام تيسە ەكەن دەپ ويلايمىن»، - دەيدى Warwick Hyperloop جوباسىنىڭ جەتەكشىسى سانجار تايجان.
سانجار كەلەشەكتە ۇلى جىبەك جولىمەن جۇك تاسىمالداۋ ىسىنە وزىندىك ۇلەسىن قوسقىسى كەلەدى. يننوۆاسيالىق جوباسىن جۇزەگە اسىرۋ ءۇشىن حالىقارالىق مەملەكەتتەردى تارتۋ ونىڭ باستى ارمانى.
You Might Also Like
-
بۇگىن تاعى دا ءتۇس كوردىم. تاڭعى اراي. مەيىرىم تولى ءبىر تانىس ولكە وز-وزىنە شاقىرادى. تاناۋىمدى قارىپ وتكەن تاڭعى سالقىن اۋا مۇنشا جىلى سەزىلەتىنىن كىم بىلگەن؟ جاعاسىندا ...
-
كۇندەردىڭ كۇنىندە جوعالىپ كەتكەن ەسەگىن ىزدەپ جۇرسە، الدىنان ءبىر قۇرداسى جولىعىپتى.
