- 26 قاڭ. 2020 00:00
- 308
اۋىلىمدى ساعىنىپ ءجۇرمىن
بۇگىن تاعى دا ءتۇس كوردىم. تاڭعى اراي. مەيىرىم تولى ءبىر تانىس ولكە وز-وزىنە شاقىرادى. تاناۋىمدى قارىپ وتكەن تاڭعى سالقىن اۋا مۇنشا جىلى سەزىلەتىنىن كىم بىلگەن؟ جاعاسىندا سايران سالىپ، قۇمنان سوعىلعان قالاشىقتىڭ حانشايىمى سەزىنەتىن ارعى بەتى كوكجيەكپەن استاسقان ءوزىمىزدىڭ تىپ-تىنىق كول جاعاسىندا كەلە جاتىرمىن. مەنىڭ بالالىق بال داۋرەنىمنىڭ بار ەستەلىگىن، شاد-شادىمان كۇلكىمدى قويناۋىنا ساقتاپ قاتپارلى جار ءاجىمدى قارت سەكىلدى كۇلىپ قارايدى. اياعى استە تايىپ سوناۋ باسىنان تومەنگە دەيىن سىرعاناپ قۇلاپ، سونان سوڭ راحاتتانا كۇلەتىن بالاپان قىزدىڭ بويجەتىپ، وزىمەنەن بوي جارىستىرىپ تۇرعانىنا تاڭىرقاپ قارايتىن سەكىلدى. قورازدىڭ كۋ-كا-رە--كۋ-لاپ شاقىرعان جاعىنا بەت الدىم.
كوتەرىلگەن كۇنمەن تالاسا ويانىپ، اۋىل ادامدارى شارۋاسىنا كىرىسىپ كەتكەلى قاشان. قوي-ەشكىلەردى شەتەننەن شىعارىپ، كورشىلەرىمەن شۇيىركەلەسىپ اتام ءجۇر. نەمەرەلەرى كورپەسىن تارتىپ الىپ، ادەتتەگىدەي اجەم توڭىپ ويانسا دا، "نۇربولىم" (مىنەزى ەر بالانىكىندەي دەپ ەر بالانىڭ اتىمەن اتايتىن) دەپ ەرەكشە ماحابباتپەن يىسكەپ، شەلەگىن سومكە سەكىلدى قولىنا ءىلىپ، موڭىرەگەن بۇزاۋلاردى ەنەسىمەن تابىستىرۋعا بەت الادى. جەڭگەم قايناتقان ساماۋىردىڭ كەرنەۋىنەن بۋداقتاتا شىعىپ، ماساحانادا ءتاتتى ۇيقىدا جاتقانداردى ءتۇتىن تۇرتكىلەپ وياتۋدا. ۇيدەگىلەر بىرىنەن سوڭ ءبىرى ساپ سالقىن سۋمەن بەتىن شايىپ ۇلكەن داستارحان باسىنا جينالادى. اجەمنىڭ ءوزى جاساعان ىرىمشىك-قۇرتى، كۇبى ءپىسىپ كەشە عانا جيناعان مايى، ءيىسى مۇرىنىڭدى جاراتىن جاڭا عانا شوققا پىسكەن ىستىق نانى، ساماۋىردىڭ ىزىلى، باۋىرلارىمنىڭ ورتاسىندا ەركەلەپ ىشكەن شايدىڭ ءبارى قانداي راحات. الەمنىڭ نەبىرى بايلىعىمەن تارازىعا قويساڭ دا ءدال وسى ءسات اۋىرلانىپ كەز كەلگەن قۇندى زاتتى دا وڭاي ەڭسەرىپ، تومەن باسىپ جاتا بەرەتىن سەكىلدى. اتام ادەتىنشە، شايدى ۇزاق باپپەن ءىشىپ وتىرىپ، مەنىڭ جايىمدى سۇراپ مەيىرلەنە:
- قۇلىنىم، ساباعىڭ قالاي؟ -دەپ سۇراۋلى ءجۇزىن ماعان اۋداردى. ءدال وسى ساتتە تەلەفون قوڭىراۋىنان وياندىم. ساعات 8:12 -دەن كەتىپتى. تەلەفوندى كوتەرسەم انام ەكەن. "قىزىم، سەنى ساعىنىپ وياندىم. دەمالىستا كەلىپ كەتسەيشى"، - دەيدى. اناشىم، قىزىڭىز دا ءۇيىن، بالالىعىن ساعىنىپ ءجۇر...