حان جۇباتۋ
ەرتەدە حالقىنا قايىرىمدى ءبىر حان بولىپتى. حالقىنا قايىرىمدى بولعان سوڭ، حانعا توڭىرەگىندەگىلەر دە قۇرمەتپەن قارايدى ەكەن.
حاننىڭ بار ۇمىت-تىلەگىندەي جالعىز ۇلى بولسا كەرەك. سول جالعىز ۇلى ەندى ەسەيىپ، ات جالىن تارتىپ مىنە باستاعان شاعىندا قايتىس بولادى. جالعىز ۇلدىڭ مەزگىلسىز قازاسى حاندى قاتتى قايعىعا باتىرىپ، كوز جاسى كوكىرەگىن جۋادى. اقىلى قۇمداي شاشىلىپ، قاسىرەت شەككەن حاندى جۇباتۋ ءۇشىن اياق جەتەر جەردەن نەبىر ەل باستاعان كوسەم، ءسوز باستاعان شەشەن كەلىپ، كوڭىل ايتادى. قايعىنى اقىلعا جەڭدىرۋىن ءوتىنىپ، سابىرعا شاقىرادى. ءبىراق حان قايعىدان ەزىلىپ، تىرىدەي سولىپ، باسىن كوتەرمەي جاتىپ الادى.
سول كەزدە، ەل ىشىندە جۇرتتان اسقان ءبىر سىبىزعىشى بولادى ەكەن. حاننىڭ باسىنداعى ازالى ءحالدى ەستىپ، ارنايى ورداعا كەلەدى. ەل بولىپ ءيىلىپ، جۇرت بولىپ جيىلىپ، حاننىڭ قايعىسىنا ورتاقتاسىپ جاتقاندا مەن دە شەت قالمايىن دەپ ويلايدى. ءسويتىپ، حانعا كەلىپ، سالەم بەرىپ، باسۋ ءسوز ايتادى. حان سول قالپى، سالەمگە جاۋاپ قاتپاستان، ىشتەي ءمۇجىلىپ، وزىمەن-وزى بولىپ، مەڭىرەيىپ جاتىپ الادى. سىبىزعىشى سالەمىنىڭ
وتپەگەنىن كوڭىلىنە المايدى. تومەندەۋ جايعاسىپ وتىرادى دا، قۇتىسىنان سىبىزعىسىن شىعارىپ، اسىقپاي سارناتا جونەلەدى. بۇرىن-سوڭدى تارتىلماعان تىڭ سارىن ەستىر قۇلاقتى ەلەڭدەتىپ، عاجايىپ سازىمەن باۋراي جونەلەدى.
سىبىزعى ءۇنى ۇزاق سارناپ، ۋىلدەي وكسىپ، ۋھىلەي كۇرسىنىپ، شەر-شەمەننىڭ ءبارىن دىبىسقا اينالدىرىپ جىبەرگەندەي بوزداپ كەلىپ توقتايدى. سوندا حان توسەكتەن باسىن كوتەرىپ، سىبىزعىشىمەن امانداسىپ، جوعارى شىعىپ وتىرۋىن ءوتىنىپ ەدى دەيدى.
سىبىزعىشى تورگە شىعىپ جايعاسقاندا، حاننىڭ قاس-قاباعىن باعىپ جۇرگەندەر كۇيشىنىڭ يىعىنا شاپان جابادى.
مىنە، حاننىڭ قايعىسىن سەرپىپ، باسىن كوتەرتكەن وسىناۋ كۇي ەل ىشىندە «حان جۇباتۋ» بولىپ تاراعان ەكەن.
You Might Also Like
-
زورلىق-زومبىلىق نەدەن تۋادى؟زورلىق-زومبىلىقتىڭ الدىن الۋ ءۇشىن نە ىستەپ جاتىرمىز جانە نە ىستەۋىمىز كەرەك؟
-
ءومىر – تەڭىز، تاعدىر – كەمە، ال كەمەڭ سۋعا باتپاس ءۇشىن ءوزىڭ كاپيتان بولۋىڭ كەرەك.
