InfoHub Logo

(ءى نۇسقا)

جوشى حاننىڭ اشامايعا مىنگىزگەن جاس بالاسى اڭشىلارمەن بىرگە ءجۇرىپ، ءبىر جەردە قاشىپ كەلە جاتقان اقساق قۇلاندى قۋىپ كەتىپتى. اقساق قۇلان جوسىپ جۇيتكىپ بارا جاتقان ءبىر توپ قۇلانعا قوسىلىپتى. بالانىڭ استىنداعى ەرىككەن تۇلپار ەلىگىپ، قۇيرىعىن شانشىپ قۇيعىتىپ قۇلاندارعا قوسىلادى. قۇلاننىڭ اڭگىسى بالانى شايناپ ءولتىرىپ كەتەدى. اڭشىلار بالانى ىزدەپ تابا المايدى. جوشى اڭشىلارعا قاھارىن توگىپ: «بالامدى تاۋىپ بەر!» دەپ، قالىڭ كىسىگە ىزدەتەدى.

«بالامدى «ءولدى» دەپ ەستىرتكەن ادامنىڭ قۇلاعىنا قورعاسىن قۇيامىن!» — دەپ جارلىق قىلادى. اڭشىلار ءبىر جەردە بالانىڭ جۇلمالانعان قولىن تابادى. ەندى ەشكىم بالاسىنىڭ ولگەنىن جوشى حانعا باتىپ ايتا المايدى. اقىرى كوپشىلىك وردادا وتىرىپ، ءبىر كۇيشىگە جىرمەن ايتقىزادى. سونداعى جىردىڭ ۇزىن-ىرعاسى مىناۋ ەكەن:

ۋا، يەمىز، جوشى حان،
دومبىرا نە دەپ جىرلايدى؟
سارناپ ءبىر داۋسىن قىرنايدى،
قۇلاعىڭ سال وسىعان.
اقساق قۇلان، قۋ قۇلان،
قياننان قاشقان تۋ قۇلان.
قيىرسىز قۇلا دالادا
اڭدا جۇرگەن بالاعا
كەز بولىپ ءبىر قاشىپتى،
بەلدەن-بەلگە اسىپتى.
اقساق قۇلان، جوشى حان!..
ەلسىز قۇبا دالادا،
قات-قات بۇدىر سالادا،
مەكەندەپ ورگەن، ءوربىسىپ،
وردالى قۇلان جوسىعان.
قۋىپ اقساق قۇلاندى،
ەرىككەن تۇلپار قۇناندى،
وردالى ۇرىككەن قۇلانعا
قۇيعىتىپ ويناپ قوسىلعان.
ءولىم دەگەن ءتاڭىر ءىسى،
جەلىككەن قۇلان اڭگىسى.
قۇلان مەن تۇلپار ەرىككەن،
جوسىعان قۇلان جەلىككەن.
بالاڭدى شايناپ ءولتىرىپ،
جۇلمالاپ جالماپ كەتىپتى
وردالى قۇلان شوشىنعان.
ءسوزدى ايتىپ جىرلاپ زارلاعان
دومبىرانىڭ بالاڭدى
ەستىرتكەنى وسى، حان!
وزگەگە ارتپا جالاڭدى،
ەلىكتىرگەن بالاڭدى،
سول قۋ قۇلان، تۋ قۇلان.
اقساق قۇلان، جوشى حان،
يلان، حانىم، وسىعان!

---