Шығыс Қазақстан облысы Шемонаиха ауданының Рассыпное ауылында 19 жастағы жігіт асфальтқа граффити салып, әкімшілік жауапкершілікке тартылды. Бұл туралы infohub.kz сайты хабарлайды.
Шығыс Қазақстан облысы полиция департаментінің баспасөз қызметінің мәліметінше, құқықбұзушылықты Шемонаиха аудандық полиция бөлімінің мобильді тобы профилактикалық жұмыс барысында анықтаған. Бұзушының кім екені анықталып, ол 19 жастағы жігіт болып шықты.
Сот оның қара түсті аэрозольді бояумен сурет пен әдепсіз жазу салып, қоғамдық орынды былғағанын анықтады. Жігіт кінәсін мойындап, болған жайтқа өкініш білдірді.
Оған Қазақстан Республикасының Әкімшілік құқықбұзушылық туралы кодексінің 434-бабының 4-бөлігі бойынша — ғимараттарды, өзге де құрылыстарды, тұрғын үй-жайларды, қоғамдық орындарды, көліктегі мүлікті және өзге де қоғамдық орындарды былғауға байланысты ұсақ бұзақылық бойынша әкімшілік хаттама толтырылды.
Сот 35 айлық есептік көрсеткіш — 151 375 теңге мөлшерінде айыппұл түріндегі әкімшілік жаза тағайындады.