Ақмола облысының тұрғыны жануарға қатыгездік көрсетіп, иттің өліміне әкеп соқтырғаны үшін қоғамдық жұмысқа тартылды, деп хабарлайды infohub.kz сайты.
Ақмола облысы соттарының ресми Telegram-арнасында жазылғандай, Жақсы аудандық соты Қылмыстық кодекстің 316-бабының 2-бөлігімен — жануарға қатыгездік көрсетіп, оның өліміне әкеп соқтырғаны үшін айыпталған адамға қатысты қылмыстық істі қарады.
Іс материалдарына сәйкес, Жақсы ауданының тұрғыны танысының ауласында азаматтық некедегі әйелін иттің аяғынан тістеп алғанын білген. Ашуланған ер адам балта алып, танысының үйіне барған да, итті шақырып алып, оның басына екі рет соққы жасаған.
Малдәрігер-маманның қорытындысы бойынша, ит алған жарақаттарынан өлген.
Сотта ер адам кінәсін мойындап, жасағанына өкінді. Оның кінәсі иттің иесінің, куәлардың айғақтарымен, сараптама қорытындысымен, оқиға орнын қараумен, бейнежазбамен және істің басқа да материалдарымен расталды.
Жаза тағайындау кезінде сот кінәні мойындау мен өкінуді, сондай-ақ сотталушының мүліктік жағдайын — ол жұмыс істемейтінін — жеңілдететін мән-жайлар ретінде ескерді.
Жәбірленуші тарап азаматтық талап қоймаған. Сот үкімімен оған 100 сағат қоғамдық жұмысқа тарту түріндегі жаза тағайындалды.
Үкім заңды күшіне енді.