Астанада өтетін World Aquatics Swimming World Cup 2026 жүзу Кубогы кезеңі қарсаңында атақты спортшылар «Барыс» хоккей клубы ұйымдастырған ерекше шеберлік сағатына қатысты. Мұзға олимпиада чемпиондары, Ойындар жүлдегерлері және әлем чемпионаттарының жеңімпаздары шықты, деп хабарлайды infohub.kz сайты.
Іс-шараға Қытайдан Юй Итинг пен Цинь Хайян, бельгиялық Рос Ваноттердейк, нидерландтық жүзушілер Маррит Стенберген мен Каспар Корбо, Гонконгтан Шивон Хоги, американдықтар Шейн Касас пен Карсон Фостер, сондай-ақ австралиялық Кэмерон Макэвой қатысты.
Спортшыларға хоккей негіздерін астаналық «Барыс» ойыншылары Дінмұхамед Қайыржан, Кирилл Панюков және Батырлан Мұратов клубтың жастар командасының өкілдерімен бірге үйретті.
Нұсқаулықтан кейін жүзушілер мұзға шығып, коньки тебуді, таяқты дұрыс ұстауды, шайбаны меңгеруді және лақтырысты орындауды үйренді. Шеберлік сағатына қатысушылардың көбісі үшін бұл хоккейде алғашқы сынақ болды.
Австралиялық олимпиада чемпионы Кэмерон Макэвой конькиге соңғы рет бала кезінде тұрғанын мойындады.
«Мен коньки тебуді тек бір рет қана көрдім — бала кезімде, он жасымда. Өздеріңіз білетіндей, Австралияда мұз бен қар көп емес, сондықтан бұл мен үшін мүлдем үйреншікті емес тәжірибе. Өзіме сынақ жасағым келді, бірақ, шынымды айтсам, оны жеңе алмадым! Дегенмен бұл өте көңілді болды. Енді мен хоккейшілерге және қысқы спорт түрлерімен айналысатындардың барлығына зор құрметпен қараймын. Бұл шынымен оңай емес», — деп бөлісті Макэвой.
Еске салайық, 15-17 қазан аралығында Астана алғаш рет жүзу Кубогының кезеңін қабылдайды. Жарыстар «Барыс Аренада» өтіп, Баку мен Ташкенттегі турнирлерден кейінгі Silk Road Tour сериясының қорытынды бөлігі болады.