Алматы көшелерінде Mercedes көлігінің жүргізушісі жол жүру ережелерін әдейі және өрескел бұзған видео әлеуметтік желілерде тарады, деп хабарлайды infohub.kz.
Полиция қызметкерлері интернет-кеңістікті мониторингтеу барысында бұзушының жеке басын жедел анықтады. Ол 19 жастағы жергілікті тұрғын болып шықты. Тексеру барысында жас жігіттің көлік жүргізу құқығы мүлдем жоқ екені анықталды.
«Осы бұзушылық үшін ол әкімшілік жауапкершілікке тартылды. Сонымен қатар, әдейі мінез-құлық және қоғамдық тәртіпті бұзғаны үшін жүргізуші полицияға жеткізіліп, Алматы қаласының әкімшілік құқық бұзушылықтар жөніндегі мамандандырылған ауданаралық сотының шешімімен ұсақ бұзақылық үшін жауапкершілікке тартылды», — деп мәлімдеді полиция.
Бұзушыға бес тәулікке әкімшілік қамау жазасы тағайындалды. Mercedes көлігі эвакуатормен айыппұл тұрағына жеткізілді.