Алматыда Қала күнін мерекелеу қарсаңында «Астана» алаңы мен Қазыбек би көшесінің бір бөлігі уақытша жабылды — қозғалыс 17 қыркүйекте сағат 15:00-ден 21 қыркүйектегі 03:00-ге дейін шектеледі, деп хабарлайды infohub.kz сайты.
Kursiv LifeStyle басылымының мәліметінше, Қазақстан-Британ техникалық университетінің алдындағы «Астана» алаңында мерекелік шараларға дайындық қызу жүріп жатыр. Мұнда 19 және 20 қыркүйекте өтетін концерттер үшін сахна, жабдық пен құрылымдар орнатылуда.
Университеттің алаңға қараған терезелері картонмен жабылған. Болжам бойынша, бағдарлама барысында оларға бейне проекцияланады.
Әкімдіктің нақтылауынша, Төле би мен Қазыбек би көшелерінің Абылай хан даңғылынан Назарбаев даңғылына дейінгі бөлігі 17 қыркүйекте сағат 15:00-ден 21 қыркүйектегі 03:00-ге дейін жабылады.
Шектеулерге байланысты он автобус бағытының қозғалыс схемасы уақытша өзгереді. Олардың қатарында: №16, 37, 48, 126, 201, 205, 206, 209, 210 және 224.
№37, 48, 201, 206, 209, 210 және 224 автобустар шығыс бағытта Абылай хан даңғылы, Қабанбай батыр көшесі және Назарбаев даңғылы арқылы жүреді. Батыс бағытта олар Назарбаев даңғылы, Бөгенбай батыр көшесі және Абылай хан даңғылы арқылы өтеді.
№16, 126 және 205 бағыттар жабылған бөлікті Гоголь, Қалдаяқов, Желтоқсан, Наурызбай батыр көшелері мен іргелес магистральдар арқылы айналып өтеді.
Еске салайық, биыл Алматының Қала күні 20 қыркүйекте атап өтіледі.