Алматыда қала тұрғындары мен қонақтары үшін тегін жүгіру жаттығулары басталды. Сабақтарды кәсіби жаттықтырушылар өткізеді, ал жарысқа жаңадан бастағандар да, тәжірибелі спортшылар да қатыса алады. Ұйымдастырушы — «Смелость быть первым» қоры, деп хабарлайды infohub.kz.
Алматы әкімдігінің баспасөз қызметінің мәліметінше, жаттығулар Орталық стадионда сәрсенбі және сенбі күндері өтеді. Мамандар жүгіру техникасын қоюға және қашықтықта күшті дұрыс бөлуге көмектеседі. Алдын ала тіркелу қажет емес, ал сабақтардың нақты уақыты @openrunam Telegram-арнасында жарияланады.
Сонымен қатар, әр жексенбіде Community Almaty Run тегін жүгірулері ұйымдастырылады. Қатысушылар қаланың жаңа бағыттарын зерттеп, ыңғайлы қарқын мен қашықтықты таңдайды. Мәреге жеткеннен кейін сарапшылар тамақтану, қалпына келтіру және жарақаттардың алдын алу бойынша кеңестер береді. Жарыстар туралы анонстар @runalmatymarathon Telegram-арнасында орналастырылады.
«Әдетте жаттығу қыздыру, жүгіру бөлігі, суыну және созылудан тұрады. Жаңадан бастаушыларға ыңғайлы қарқынды таңдау және бұл бірінші сабақ болса, жаттықтырушыға алдын ала хабарлау ұсынылады. Жаттығу үшін ыңғайлы спорттық киім, жүгіру кроссовкалары және су жеткілікті», — делінген хабарламада.
Жаттығуды бастауға тамаша себеп — әкімдіктің қолдауымен 27 қыркүйекте өтетін 15-ші мерейтойлық Almaty Marathon. Жарысқа әлемнің түкпір-түкпірінен 16 мың адам қатысады деп күтілуде.
Бұған дейін «Курсив» Алматы облысында Basqu Race Nation Kazakhstan 2026 жарысына Қазақстан мен басқа елдерден 1800-ге жуық адам шыққанын жазған болатын. Бұл жарысты қарапайым жүгіру деп атау қиын: қатысушылар арқан мен биік қабырғаларға өрмелеп, қол көлденеңдерден өтіп, лай мен суды бағындырып, рамптардан секіріп, күш сынайтын кедергілерді еңсерді.