Арменияның бұрынғы президенті Роберт Кочарян мемлекеттік меншікті иемдену және миллиардтаған драм көлемінде пара алу схемаларына қатысты айып тағылғаннан кейін ауруханаға жеткізілді, деп хабарлайды infohub.kz сайты.
Бұған дейін Кочарян республиканың Сыбайлас жемқорлыққа қарсы комитетіне келіп, оның ұсталғаны саясаткердің өкілдері тарапынан расталған еді. Енді істің ресми мәліметтері белгілі болды.
News.am мәліметінше, Сыбайлас жемқорлыққа қарсы комитет Кочарянның ұсталғанын растап, айыптау мәнін ашты. Ведомствоның мәлімдеуінше, бұрынғы президент жақын адамдарымен алдын ала сөз байласып, қызмет бабын пайдалана отырып, жалған негіздер бойынша мемлекет меншігіндегі бірқатар құнды жылжымайтын мүлікті нарықтық бағадан айтарлықтай төмен бағамен сатып алып, иемденген.
Мүліктің нақты иесін жасыру үшін ол өзара байланысты компанияларға ресімделген, кейін бұл активтер құрылыс, сату және үлестерді беру, оның ішінде сыйға тарту жолымен пайдаланылған.
Тағы бір эпизод бойынша, Қорғаныс министрлігіне тиесілі және ғылыми-өндірістік станция салуға арналған жер телімдері бұрынғы президентке жақын компанияға нарықтық бағадан төрт есе төмен бағамен сатылған.
Сонымен қатар, тергеу органдарының мәлімдеуінше, жер телімдерін төмен бағамен сату және Арменияда жапондық «Тойота» компаниясының өкілдігін кедергісіз құруды қамтамасыз еткені үшін 2006 жылғы 9 мамырда Кочарянға пара ретінде «Тойота Ереван» компаниясының 30 пайыздық үлесі берілген. Бұл үлес бұрынғы президенттің ұлының атына жалған сатып алу-сату шарттарымен ресімделген.
Қылмыстық іс аясында Кочарянның өзі, оның ұлы және қылмыстық схемаларға қатысы бар басқа да адамдар қоса алғанда, алты адам ұсталды.
Тергеу сонымен қатар экс-президенттің ұлының атына 2001–2019 жылдары аударылған ақша аударымдарын зерттеп жатыр: шамамен 144 млрд драм, 309 млн АҚШ доллары, 77 млн еуро және 18 млн ресей рублі, сондай-ақ Арменияда және шетелде отыздан астам жылжымайтын мүлік нысанын сатып алу. Мүлікті иемденуді болдырмау үшін оған тыйым салынды.
Салық органдары «Toyota» компаниясының Еревандағы кеңсесін мөрлеп тастады. Сыбайлас жемқорлыққа қарсы комитет қызметкерлері сондай-ақ Кочаряндар отбасы үлесі бар «Оранж Фитнес» клубы мен «Плей сити» ойын-сауық орталығында тергеу әрекеттерін жүргізуде.
РБК деректеріне сәйкес, армяндық 24news.am басылымы ұсталғаннан кейін Кочарянды Ұлттық қауіпсіздік қызметі қызметкерлерінің ертіп жүруімен жедел жәрдем көлігімен ауруханаға жеткізгенін хабарлады. Оның жағдайы туралы басқа ақпарат әзірге жоқ.