Қазақстан астанасында жылқының ысталған етін арзан бағамен сату сылтауымен 31 адамды алдаған кәсіпкерге үкім шығарылды, деп хабарлайды infohub.kz сайты.
Астана прокуратурасының мәліметінше, ер адам Instagram мен WhatsApp арқылы азаматтардан алдын ала төлем алып, тауарды жеткізу міндеттемесін әдейі орындамаған.
Сатып алушыларды адастыру үшін ол бұрын орындалған тапсырыстар мен оң пікірлерді пайдаланған, ал түскен қаражатты жеке қажеттіліктеріне жұмсаған.
Қылмыстық әрекеттер салдарынан 31 жәбірленушіге 1,7 млн теңгеден астам материалдық шығын келтірілді, деп атап өтті қадағалау органында.
Сот үкімімен залалды толық өтеуін ескеріп, оған пробациялық бақылау белгілей отырып, екі жыл сегіз айға бас бостандығын шектеу жазасы тағайындалды. Үкім заңды күшіне енген жоқ.
«Астана прокуратурасы азаматтарды әлеуметтік желілер мен мессенджерлер арқылы сатып алу кезінде сақ болуға және тексерілмеген сатушыларға алдын ала төлем ретінде ақша аудармауға шақырады», — делінген қадағалау органының хабарламасында.