Астанада қаржы пирамидасы құрылымдық бөлімшесінің басшысына қатысты айыптау үкімі оқылды. Оның әрекетінен екі салымшы шамамен 23 млн теңгеден айырылды, деп хабарлайды infohub.kz сайты.
NUR.KZ-тің Астана соттарына сілтеме жасап хабарлауынша, 2026 жылғы 17 қыркүйекте Астананың ауданаралық қылмыстық істер жөніндегі соты Қылмыстық кодекстің 217-бабы 3-бөлігінің 2-тармағы бойынша қаржы пирамидасын құрып, оған басшылық етті деп айыпталған М. азаматшасын кінәлі деп таныды.
«Қылмыстық тергеу органы М.-ны World Business Consulting қаржы пирамидасының құрылымдық бөлімшесіне басшылық етті деп айыптады. Алтыншы деңгейдегі директор бола тұра, ол жәбірленушілерге жалпы сомасы шамамен 23 млн теңге материалдық залал келтірді», — делінген сот хабарламасында.
Сот 2020 жылдың тамыз–қыркүйек айларында М. қаржы пирамидасына басшылық ете жүріп, ерекше ірі мөлшерде ақша қаражатын тартқанын анықтады. Оның әрекетінен екі жәбірленушіге материалдық залал келтірілді: Б. — шамамен 8 млн теңге, Р. — шамамен 15 млн теңге.
«Сотталушының кінәсі жәбірленушілер мен куәгерлердің айғақтарымен, заттай дәлелдемелермен және қылмыстық істің басқа да материалдарымен дәлелденді. Прокурор М.-ға 6 жылға бас бостандығынан айыру жазасын, сондай-ақ азаматтардың ақша қаражаты мен инвестицияларын тартуға байланысты қызметпен айналысу құқығынан 5 жылға айыруды сұрады. Сотталушы кінәсін ішінара мойындады. Қорғаушы тарап оның әрекетінде қылмыстық құқық бұзушылық құрамы жоқ деп ақтауды сұрады», — делінген сот хабарламасында.
Айта кетейік, Қылмыстық кодекстің 217-бабы 3-бөлігінің санкциясы мүлкі тәркіленіп, 5 жылдан 12 жылға дейін бас бостандығынан айыруды, сондай-ақ 7 жылға дейін белгілі бір лауазымдарды атқару немесе белгілі бір қызметпен айналысу құқығынан айыруды көздейді.
Жаза тағайындау кезінде сот залалды ішінара өз еркімен өтеуді жеңілдететін мән-жай ретінде ескерді. Ауырлататын мән-жайларды сот анықтаған жоқ.
«Жасалған қылмыстық құқық бұзушылықтың мән-жайы мен ауырлық дәрежесін, жеңілдететін мән-жайдың бар екенін және ауырлататын мән-жайлардың жоқтығын (бұрын сотты болмаған) ескере отырып, сот М.-ны ҚК 217-бабы 3-бөлігінің 2-тармағы бойынша кінәлі деп танып, жазасын қылмыстық-атқару жүйесінің ең төменгі қауіпсіздік мекемесінде өтеумен 5 жылға бас бостандығынан айыруға, сондай-ақ азаматтардың ақша қаражаты мен инвестицияларын тартуға байланысты қызметпен айналысу құқығынан 5 жылға айыруға тағайындады», — деді сотта.
Жәбірленуші Б.-ның азаматтық талап-арызы қанағаттандырылды. Үкім заңды күшіне енген жоқ.