Тоғыз спорт түрі, үш күндік жарыс және республикалық деңгейде өзіңді таныту мүмкіндігі: Астанада 10 мен 16 жас аралығындағы ерекше қажеттілігі бар 600 жас спортшыны біріктірген «Жұлдызай-26» ұлттық инклюзивті ойындары өтіп жатыр. Бағдарламаға алғаш рет киберспорт пен блайнд-футбол енгізілді, деп хабарлайды infohub.kz сайты.
Ойындардың салтанатты ашылу рәсімі 14 қазанда өтті. Астанаға Қазақстанның барлық өңірінен командалар келді. Жас спортшылар үшін республикалық жарысқа қатысу — өз күшін сынау, туған өлкесін таныстыру және спорттық жетістіктерінің мойындалуына қол жеткізу мүмкіндігі.
Көп жылдан бері «Жұлдызай» ұлттық инклюзивті ойындары елдің түкпір-түкпірінен келген балаларды, жаттықтырушылар мен отбасыларды біріктіріп келеді. Олардың маңызы жарыс алаңынан әлдеқайда кең: ойындар балаларды спортпен тұрақты шұғылдануға ынталандырып, қабілеттерін ашуға көмектеседі және Қазақстандағы адаптивті спорттың дамуына назар аудартады. Жаттығу мен жарысқа қолжетімділік көбірек балаға спорттық және қоғамдық өмірдің бір бөлігі болуға мүмкіндік береді.
«Балалар үшін «Жұлдызай» — жыл бойы күнделікті жаттығып, асыға күтетін ең басты оқиғалардың бірі. Біз әрбір жас қатысушының өз күшіне сеніп, жеңіс қуанышын сезініп, нағыз чемпион жолынан өтуін қалаймыз. Әрбір баламызды шын жүректен мақтан тұтамыз!» — деді «Жұлдызай» қорының директоры Гүлхан Исабаева.
Ойындар бағдарламасы тоғыз спорт түрін қамтиды: жеңіл атлетика, мини-футбол, үстел теннисі, асық ату, бес асық, тоғызқұмалақ, шоудаун, киберспорт және блайнд-футбол. Дисциплиналардың алуан түрлілігі қатысушыларға жылдамдық, төзімділік, дәлдік, стратегиялық ойлау және командада жұмыс істеу қабілетін көрсетуге мүмкіндік береді. Бағдарламаға алғаш рет енгізілген блайнд-футбол көру қабілеті бұзылған жас спортшылардың қатысу мүмкіндігін кеңейтеді. Киберспорттың пайда болуы балалар дағдыларын дамытып, нәтижеге жете алатын тағы бір бағыт ашады.
Жарыстар астананың төрт алаңында өтеді: Qazaqstan жеңіл атлетика кешені, Инклюзивті спорт орталығы, Riviera International School және Паралимпиадалық жаттығу орталығы.
«Жұлдызай» — жарыстан әлдеқайда көп. Бұл — біз, жаттықтырушылар, және балаларымыз жыл бойы дайындалатын мереке. Ойындар балаларға ынта береді, спорттық мінезін шыңдайды және өздерін чемпион ретінде сезінуге көмектеседі. Балаларымызды мақтан тұтамыз және осы жарысты жыл сайын өткізуге мүмкіндік берген ұйымдастырушылар мен демеушілерге алғыс айтамыз», — деп бөлісті Ақтөбе облысының жаттықтырушылары.
«Жұлдызай» ұлттық инклюзивті ойындары ҚР Туризм және спорт министрлігінің спорт және дене шынықтыру істері комитеті бекіткен 2026 жылға арналған спорттық-бұқаралық іс-шаралардың бірыңғай республикалық күнтізбесіне енгізілген.
Ойындарды ұйымдастырушы — ерекше білім беру қажеттілігі бар балаларға көмектесетін «Жұлдызай и К» қоғамдық қоры. Бас серіктестер — BI Group құрылыс холдингі, «Самұрық-Қазына» ҰӘҚ» АҚ және Sport Qory спортты қолдау қоры. Жарысты өткізуге өңірлер әкімдіктері, спорт және білім басқармалары, спорт федерациялары да қолдау көрсетті. Ақпараттық серіктес — Qazsport телеарнасы.