Қазақстан ауылдық жерлерде тұрғын үй сатып алуға немесе салуға көтерме жәрдемақы мен бюджеттік кредит берілетін мамандар тізімін кеңейтті. Енді мемлекеттік қолдау алушылар қатарына цифрлық технологиялар және мұрағат ісі саласының қызметкерлері де қосылды, деп хабарлайды infohub.kz сайты.
Тиісті жаңалықтар Ұлттық экономика министрлігінің 2026 жылғы 29 қыркүйектегі № 160 бұйрығымен бекітілген. Құжат 2026 жылғы 16 қазанда күшіне енеді.
Жаңартылған ережелерге сәйкес, жеңілдіктерге сырттан келген мамандар ғана емес, оқуын бітірген соң туған жеріне оралып жұмыс істеген ауыл түлектері де үміттене алады. Маман өтінішті келген немесе тіркелген сәттен бастап үш жыл ішінде бере алады.
Мемлекеттік қолдау мөлшері бұрынғы деңгейде қалды. Көтерме жәрдемақы 100 АЕК — 2026 жылы шамамен 4,33 млн теңге. Тұрғын үйге жеңілдетілген бюджеттік кредит аудан орталықтары үшін 2 500 АЕК-ке (10,8 млн теңге), қалған ауылдық елді мекендер үшін 2 000 АЕК-ке (8,7 млн теңге) жетеді.
Сонымен қатар құжат әзірлеушілері мемлекеттік қызметті тоқтата тұру негіздерін кеңейтті.
Үйді өз бетінше салатындарға да жаңа талап қойылды: қолдау алушы құрылыс басталғаны туралы мемлекеттік сәулет-құрылыс бақылау органдарына кемінде 10 жұмыс күні бұрын хабарлауға міндетті.
Еске салайық, 2025 жылғы желтоқсандағы деректер бойынша Қазақстанда IT-маманның орташа жалақысы 800 мың теңгеден асқан. Бұл саланың кәсіпқойлары дәстүрлі түрде елдегі ең жоғары жалақы алатындардың қатарында.
Бұған дейін «Курсив» Қазақстанда еңбек ресурстары тапшы өңірлерге ерікті түрде қоныс аудару бағдарламасы жаңартылғанын жазған болатын.