Сент-Луисте (АҚШ) өтіп жатқан әйелдер арасындағы Cairns Cup-2026 супертурнирінің алтыншы турында қазақстандық гроссмейстер Бибисара Асаубаева қарамен ойнап, америкалық халықаралық шебер Карисса Йиппен тең ойнады. Кездесу күрделі шахмат жарыстары үшін сирек кездесетін нәтижемен аяқталды: тақтада тек екі король қалды, деп хабарлайды infohub.kz.
Эндшпильде Асаубаева екі пешканың бірін ферзьге жеткізуге тырысты, алайда ақтардың пілі мен королі теңдікті сақтап қалды. 59-шы жүрісте екі жақтың да фигуралары айырбасталып, қарсыластар тек корольдермен қалып, келісімге келді.
Бұл кезде тағы бір америкалық қатысушы, халықаралық шебер Элис Ли қарамен үндістандық шахматшы Хампи Конераны жеңіп, Асаубаева бастаған қуушылар тобынан озып кетті. Үш соңғы тур алдында 16-шы әлем чемпионы (2017–2018) қытайлық Тань Чжунъи көш бастап тұр.
Қатарынан екі партияны қарамен ойнаған қазақстандық келесі турда ақпен ойнайды. Жүлделі орынға үміткер болу үшін Асаубаеваға Ставрула Цолакиданы жеңу қажет. Грекиялық халықаралық шебер де, Бибисара да Сент-Луисте әлі жеңілмеген.
Жүлде қоры 250 000 долларды құрайтын беделді әйелдер супертурнирі Cairns Cup АҚШ шахматының қасиетті орны — Сент-Луисте (Миссури штаты) өтуде. Турнир Сент-Луис шахмат клубының негізін қалаушылардың бірі, әлемдік шахмат даңқ залына кіретін Джинн Кэрнс Синкфилдтің құрметіне аталған.
Ұйымдастырушылардан жеке шақырту алған он шахматшы бір айналымда ойнайды. Уақыт бақылауы классикалық: 40 жүріске 90 минут, содан кейін партия соңына дейін 30 минут, әр жүріске біріншіден бастап 30 секунд қосылады.
Сент-Луисте қатар ерлер турнирі — Sinquefield Cup-2026 де өтуде, ол да Джинн Кэрнс Синкфилдтің құрметіне аталған. Жүлде қоры 475 000 доллар болатын жарысқа шахмат тәжіне үміткер, біздің Асаубаеваның жігіті Жавохир Синдаров қатысуда. Демалыс күнінен кейін өзбек шахматшысы ақпен ойнап, турнирдің рейтингтік фавориті америкалық Фабиано Каруанамен тең ойнады. Теңдік 42-ші жүрісте тіркелді.