Қазақстандық Александр Бублик (208-орын) америкалық Бен Шелтонмен (125) жұптасып, АТП-1000 Rolex Shanghai Masters турнирінің жұптық разрядының бірінші айналымынан өте алмады. Ол беларусь-ресейлік Иван Лютаревич (91) / Даниил Медведев (352) жұбына 4:6, 3:6 есебімен жол берді, деп хабарлайды infohub.kz сайты.
Бірінші партияда Лютаревич пен Медведев бір брейк-пойнтты, екінші сетте екеуін пайдаланды. Бублик пен Шелтон бүкіл матч бойы қарсыластың берісін ала алмады. Кездесу небәрі 49 минутқа созылды. Жеңімпаздар 57 ұпай жинаса, қарсыластары 37 ұпаймен шектелді.
Бір күн бұрын Бублик (22) жекелей сында чех Томаш Махачты (75) 6:4, 6:4 есебімен жеңіп, сәтті бастады. Шелтон (4) өз кезегінде неміс Даниэль Альтмайерді (67) 6:3, 7:6 (8:6) есебімен ұтты. Жұптас серіктестер ширек финалда кездесуі мүмкін.
Жекелей сетканың екінші айналымында Александр жапон Брэндон Никашимамен (19) кездеседі. Ол стартта итальян Маттео Берреттиниді (46) 7:6 (7:4), 7:5 есебімен жеңген болатын.
Шанхайдың жекелей разрядында Бубликке серіктес болуға Тимофей Скатов (210) үміттенген еді, алайда ол квалификацияның екінші раундында австралиялық Бернард Томичке (185) 5:7, 4:6 есебімен жол берді.
Rolex Shanghai Masters (демеушілік атауы) — жүлде қоры 9,4 миллион доллар болатын АТП-1000 сериясындағы беделді ерлер теннис турнирі. Бұл Солтүстік Америка мен Еуропадан тыс жерде өтетін, 2009 жылы қазіргі форматқа ие болған жалғыз Masters-1000 жарысы.
Шанхайдың хард кортындағы жеңістер бойынша рекордшы — Новак Джокович (8). Ол бұл турнирді төрт рет жеңіп алған. Ағымдағы жарыста серб поляк Хуберт Хуркачқа (34) бірінші матчта-ақ 4:6, 3:6 есебімен жол берді.
Бас жүлдені үш рет британдық Энди Маррей, екі рет швейцариялық Роджер Федерер жеңіп алған. Олардан бөлек, жеңімпаздар қатарында ресейліктер Николай Давыденко мен Даниил Медведев, аталған поляк Хуркач және итальян Янник Синнер бар.
Қазіргі чемпион, монегаск Валантен Вашеро өткен жылғы финалда француз Артур Ринденкнехті 4:6, 6:3, 6:3 есебімен жеңген еді. Айта кетейік, Шанхай-2025 екінші айналымында Вашеро квалифа болып, біздің Бубликті 3:6, 6:3, 6:4 есебімен ұтқан болатын.