Қазақстандық теннисші Дамир Жалғасбай америкалық Сафир Азаммен бірге US Open-2026 жасөспірімдер арасындағы жұптық сында сәтті старт алды, деп хабарлайды infohub.kz.
Бірінші айналымда Жалғасбай/Азам дуэті тай-үнді жұбы Кунанан Пантараторн мен Арнав Папаркарды 6:4, 6:2 есебімен жеңді. Кездесу 58 минутқа созылды.
Бірінші сетте оныншы геймде жасалған брейк шешуші болды. Екінші партияда қазақстандық пен америкалық басынан бастап бастаманы қолға алып, брейкпен 3:0 есебіне жетіп, матчты сенімді аяқтады.
Ширек финалға шығу үшін Жалғасбай мен Азам жапондық Хью Каваниши мен Канта Ватанабе дуэтімен кездеседі. Олар бірінші айналымда үшінші ракеткалар америкалықтар Майкл Антониус пен Джордан Лиді 6:3, 7:5 есебімен жеңген.
Жалғыз сында Жалғасбай алғашқы матчта америкалық Джек Секордқа есе жіберіп, жарысты аяқтады.
Нью-Йоркте Елена Рыбакина да бақ сынап жатыр. Әлемнің екінші ракеткасы ширек финалда қытайлық Чжэн Циньвэньді жеңсе, жартылай финалға шыға алады.
АҚШ ашық чемпионаты — жыл сайынғы «Үлкен дулыға» турнирі, хард кортында өтеді және күнтізбелік жылдағы төрт мейджордың соңғысы. Жалпы жүлде қоры рекордтық 108 миллион долларды құрайды.
1978 жылдан бастап матчтар Нью-Йорктегі Билли Джин Кинг атындағы Ұлттық теннис орталығында өткізіледі.
Ерлер арасындағы қазіргі чемпион — Карлос Алькарас. Ол былтырғы финалда Янник Синнерді жеңген. Испаниялық теннисші америкалық Томми Полды (21) 6:4, 6:3, 6:4 есебімен ұтып, биылғы турнирдің ширек финалына шықты.
Әйелдер арасында 2025 жылғы жеңімпаз Арина Соболенко болды. Шешуші матчта ол америкалық Аманда Анисимованы ұтқан еді. Беларусь теннисшісі бүгін чех Линда Носкованы 7:6 (7:1), 3:6, 7:6 (10:7) есебімен жеңіп, 2026 жылғы жартылай финалға шықты.