Жамбыл облысының Меркі ауданында 580 гектар жабайы қарасора шабылып, өртелді. Бұл – жалпы өсімдік алқабының шамамен 3 пайызын құрайды, деп хабарлайды infohub.kz.
Жамбыл облысы прокуратурасының мәліметінше, 2026 жылдың маусымынан бастап «Қарасора – 2026» жедел-алдын алу іс-шарасы аясында жабайы қарасораны анықтау және жою бойынша кешенді шаралар жүргізілуде. Аудандағы қарасораның жалпы алқабы шамамен 19 мың гектарды құрайды. Бүгінгі күнге дейін 376 тонна өсімдік шабылып, өртеу арқылы жойылды.
Осылайша, жабайы қарасораның нақты өнімділігі гектарына орташа есеппен 6,5 центнерді құрады. Жұмыс тобының мүшелерінен бөлек, 14 ауылдық округтен 28 ерікті тартылып, қажетті арнайы техника жұмылдырылды.
Қадағалау органында атап өткендей, жабайы қарасораны жою жүйелі түрде жүргізіліп, есірткінің заңсыз айналымының алдын алудың маңызды шарасы болып табылады. Кешенді жұмыстың арқасында есірткі қылмысының деңгейі төмендеп келеді: 2025 жылдың 7 айында 45 есірткі қылмысы тіркелсе, биылғы жылдың осы кезеңінде – 28, яғни 37,8 пайызға аз.
Іс-шаралардың негізгі мақсаттары – есірткі қылмысының алдын алу, есірткі заттарының заңсыз айналымына жол бермеу, қоғамдық қауіпсіздікті қамтамасыз ету және жас ұрпақты есірткінің зиянды әсерінен қорғау.
Прокуратура есірткіні заңсыз өсіру, сақтау, тасымалдау, сату және өзге де әрекеттер Қазақстан заңнамасына сәйкес жауапкершілікке әкеп соғатынын еске салды.
Бұған дейін елордалық Leodar компаниясы Солтүстік Қазақстан облысында техникалық қарасора өсіріп, өңбекші болғаны хабарланған болатын. Жобаның құны 150 млн долларға бағаланған, жер телімі 26,4 мың гектарды құрайды. Алайда компания әлі күнге дейін жерді ресімдеуге құжат тапсырмаған және қаржыландыру көздерін іздеп жүр. Leodar компаниясының басшысы және иесі – Әлібек Қасымов. 2025 жылы ауыл шаруашылығы вице-министрі Азат Сұлтанов бұл аймақта техникалық қарасорадан қағаз өндіру жобасын іске қосу жоспары туралы мәлімдеген.