Алматының «Қайраты» (U19) УЕФА Жастар лигасының бірінші раундында өз алаңында Черногорияның «Младость Донья Горице» командасын қарымта матчта 8:1 есебімен ойсырата жеңді. 15 қыркүйекте өткен алғашқы кездесу де Жора Арутюнян шәкірттерінің ірі жеңісімен — қонақта 5:0 есебімен аяқталғандықтан, қарымта ойын формальді сипат алғанымен, ол да тас-талқан жеңіспен бітті, деп хабарлайды infohub.kz сайты.
УЕФА ЖАСТАР ЛИГАСЫ-2026/27. Чемпиондар жолы. Бірінші раунд. Қарымта матч. 14 қазан. «Қайрат» (Алматы, Қазақстан) — «Младость Донья Горице» (Подгорица, Черногория) — 8:1 (4:0). Бірінші матч — 5:0. Голдар: Исмағұлов, 5 (1:0), Орынбасар, 28, пенальтиден (2:0), Трубин, 37 (3:0), Трубин, 42 (4:0), Пантич, 70 (4:1), Ташпулатов, 76 (5:1), Төлеухан, 79 (6:1), Нұржан, 88, пенальтиден (7:1), Жылқайдар, 90+1 (8:1). Никочевич («Младость», 87) алаңнан қуылды.
5-минутта Төре Исмағұлов Черногорияда үшінші голды соққан Ермұхаммед Керімханның пасынан кейін есеп ашты. Ойынның жарты сағаты аяқталар тұста австриялық төреші Арнес Талич Андрийя Брновичтің сол Керімханға қарсы қателігі үшін пенальти тағайындады, Дәулет Орынбасар үкімді орындады — 2:0. Бірінші тайм бітпей жатып Артур Трубин дубль жасап, есепті 4:0-ге жеткізді.
Үзілістен кейін командалар қорғаушылардың голдарымен алмасты: черногориялық Петар Пантичтің добына Данияр Ташпулатов жауап берді. Содан кейін алаң иелерінің жартылай қорғаушылары Абылай Төлеухан мен екінші пенальтиді соққан Еркін Нұржан көзге түсті. Матчтағы нүктені Акежан Каликуловтың пасынан Абылай Жылқайдар қойды — 8:1.
Өткен маусымда жас қайраттықтар УЕФА Жастар лигасының жалпы кезеңінде клубтың ересек командалары Чемпиондар лигасында ойнаған қарсыластарымен кездескен болатын. Ал қазір алматылық жастар Чемпиондар жолымен жүр. Плей-оффқа шығу үшін олар үш іріктеу кезеңінен өтуі керек.
«Младостьтан» кейін «Қайрат» жастарын 28 қазан мен 4 қарашада венгриялық МТК-мен ойындар күтіп тұр. Жеңіс жағдайында алматылықтар 25 қараша мен 9 желтоқсанда не мальталық «Валеттамен», не албаниялық «Партизанмен», не чехиялық «Градец-Кралове» клубымен ойнайды.
УЕФА Жастар лигасының 1/16 финалының жеребесі 11 желтоқсанда Ньонда тартылады.
УЕФА Жастар лигасының формуласы мынадай. Бірінші кезеңде 86 ұжым екі үлкен топқа бөлінеді. Ересек Чемпиондар лигасының жалпы кезеңіндегі клубтардың 36 жастар командасы Чемпиондар лигасы жолымен жүреді. Қалған 50-і елдердің Чемпиондар жолымен жүреді. 1/16 финалдан бастап жолдар бірігеді.
Чемпиондар лигасы жолындағы 36 клубтың 22 үздігі 1/16 финалға шығады. Бұл кезеңде 1-ден 6-ға дейінгі орындарды иеленген командалар 17-ден 22-ге дейінгі орындарды иеленген қарсыластарымен кездеседі. Ал 7-ден 16-ға дейінгі орындардағы клубтар Чемпиондар жолының сегіз үздік командасымен ойнайды.