Футзалдан ел чемпионы алматылық «Қайрат» сенбіде, 19 қыркүйекте ұлттық біріншіліктің тұрақты маусымының үшінші турында «Семейді» ұтып, тұрақты кезеңнің көшбасшысына айналды, деп хабарлайды infohub.kz сайты.
Футзалдан ел чемпионатының тұрақты маусымы бір апта бұрын басталған еді, алғашқы екі турдан кейін екі жеңіске жеткен төрт көшбасшы болды. Кестенің басында екі ойында жоғары лига дебютанты көкшетаулық «Оқжетпестің» қақпасына 17 гол соққан ел вице-чемпионы «Семей» тұрды. Сондай-ақ 6 ұпай «Каспийде» — ол сырт алаңда «Астананы» екі рет ұтты, ел чемпионы «Қайратта» — ол тағы бір дебютант «Елорданы» екі рет тізе бүктірді, және «Ақтөбеде» — ол сырт алаңда «Шымкентті» екі рет ұтты.
Сенбіде, 19 қыркүйекте үшінші тур көшбасшылар төрттігінің бір мүшесінің шығып қалуымен басталды: «Каспий» астанада күтпеген жерден «Елордаға» 4:7 есебімен жол беріп, 6 ұпаймен бесінші орынға түсті. Ал үшінші турдың орталық матчы Алматыда өткен маусымның екі финалисі — жергілікті «Қайрат» пен «Семей» арасында өтті. Қонақтар бұл ойында есепті бірінші ашты: өзінің бұрынғы клубының қақпасын «Қайраттың» экс-капитаны Біржан Оразов дәл көздеді, алайда кейін «Семейдің» қақпашысы Жайме алаңнан қуылды да, Азат Валиуллин теңдікті қалпына келтірді.
Көп ұзамай тағы бір экс-қайраттық Шыңғыс Есенаманов қонақтарды қайтадан алға шығарды, бірақ Атирсон Оливейра мен Кайо Руис үзіліске дейін Алматы клубының есепте басымдығын орнатты — 3:2. Ал Жаһангир Рашит пен Кайо Руис үзілістен кейін «Қайраттың» басымдығын тіпті айқындай түскенде, бұл матчта бәрі шешілгендей көрінуі мүмкін еді. Алайда кейін «Семейдің» екі легионеры Педриньо мен Дедезиньо өз командасының артта қалуын азайтты, қонақтар құтылуға құлшына ұмтылды, бірақ уақыт жетпеді — «Қайраттың» пайдасына 5:4.
Алматылықтар 9 ұпай жинап, тұрақты маусымның көшбасшысы атанды, рас, тек соғылған және жіберілген голдар айырмасы бойынша, өйткені көшбасшылар төрттігінің тағы бір мүшесі «Ақтөбе» сырт алаңда «Оқжетпеспен» матчта соңғы минуттарда 3:2 есебімен жеңіске жетіп, сондай-ақ 9 ұпай жинады. Үшінші орынды 7 ұпаймен сенбіде сырт алаңда «Шымкентті» 4:2 есебімен ұтқан «Атырау» иеленді, сондай-ақ 7 ұпай рудныйлық «Аяттың» еншісінде — ол Қарағандыда жергілікті «Тұлпарды» 3:1 есебімен ұтты.
«Семей» мен «Каспий» 6 ұпаймен енді бесінші-алтыншы орындарды бөлісті, «Тұлпар» 5 ұпаймен жетінші орында, сегізінші орында 3 ұпаймен «Елорда» тұр, тоғызыншы — екі матчтан кейін 1 ұпайы бар оралдық «Бәйтерек», әзірге бір де бір ұпай жинай алмағандар: «Астана», «Шымкент» және «Оқжетпес». Жексенбіде, 20 қыркүйекте төртінші тур аясында сол жұптарда қайта матчтар өтеді, орталық кездесу де Алматыда «Қайрат» пен «Семей» арасында болады.