Алматының «Қайраты» (U19) УЕФА Жастар лигасындағы алғашқы ойынын Черногорияның «Младость Донья Горице» клубын қонақта 5:0 есебімен ойсырата жеңумен бастады. Чемпиондар жолының бірінші раундындағы кездесу 15 қыркүйекте өтті, деп хабарлайды infohub.kz сайты.
Жора Арутюнянның шәкірттері қожайындарға еш мүмкіндік қалдырмады. Тіпті бірінші тайм бітпей жатып, алматылықтар «Младость» қақпашысы Дамьян Янковичтің қоржынына үш доп салды: 35-тен 43-ші минутқа дейін Роман Черноморец, Ақежан Каликулов және Ермұхаммад Керімхан көзге түсті.
Екінші таймда Абылай Жылқайдар мен Санат Нұрболат есепті одан әрі ұлғайтып, Алматыдағы қарымта ойынды формальді іске айналдырды. Қорытынды есеп — қазақстандық команданың пайдасына 0:5 (0:3).
Өткен маусымда жас қайраттықтар УЕФА Жастар лигасының жалпы кезеңінде клубтың ересек командалары Чемпиондар лигасында кездескен қарсыластарымен ойнаған болатын. Бұл жолы алматылық жасөспірімдер Чемпиондар жолы деп аталатын жолмен жүр: плей-оффқа шығу үшін олар үш іріктеу кезеңінен өтуі керек.
«Младостьтан» кейін «Қайрат» жастарын венгриялық МТК-мен 28 қазан және 4 қарашадағы ойындар күтіп тұр. Жеңіс жағдайында алматылықтар 25 қараша мен 9 желтоқсанда не мальталық «Валеттамен», не албандық «Партизанмен», не чехиялық «Градец-Кралове» клубымен ойнайды. «Младостьпен» қарымта ойын 14 қазанға белгіленген.
1/16 финалдың жеребесі 11 желтоқсанда Ньонда тартылады.
УЕФА Жастар лигасының формуласы мынадай. Бірінші кезеңде 86 ұжым екі үлкен топқа бөлінеді. Ересек Чемпиондар лигасының жалпы кезеңіндегі клубтардың 36 жастар командасы Чемпиондар лигасының жолымен, қалған 50-і елдердің Чемпиондар жолымен жүреді. 1/16 финалдан бастап жолдар бірігеді.
Чемпиондар лигасы жолындағы 36 клубтың 22 үздігі 1/16 финалға шығады. Бұл кезеңде 1-ден 6-ға дейінгі орындарды иеленген командалар 17–22 орындардағы қарсыластармен кездеседі. Ал 7-ден 16-ға дейінгі орындардағы клубтар Чемпиондар жолының сегіз үздік командасымен ойнайды.