Бүгін Қазақстанда Каспий теңізі күні аталып өтілуде. Дәл 20 жыл бұрын Каспий теңізінің теңіз ортасын қорғау жөніндегі негіздемелік конвенция, яғни Тегеран конвенциясы күшіне енді. Мереке қарсаңында елімізде «Таза Қазақстан» экологиялық мәдениетін дамыту тұжырымдамасы аясында «Caspian Sea Action Week 2026» халықаралық волонтерлік апталығы өтті, деп хабарлайды infohub.kz сайты.
Апталық іс-шараларына барлық Каспий маңы мемлекеттерінің делегациялары — Әзірбайжан, Ресей, Иран және Түрікменстан, сондай-ақ Өзбекстан, Қырғызстан және Тәжікстан өкілдері қатысты. Оларға волонтерлер, экологиялық белсенділер, сарапшылар және жастар өкілдері қосылды.
6 тамызда апталықтың салтанатты ашылу рәсімі өтті, ал келесі күні экологиялық мониторингтің заманауи технологиялары мен Каспий маңы елдерінің ғылыми зерттеулеріне арналған халықаралық семинар мен дөңгелек үстел өтті.
Апталықтың басты оқиғаларының бірі — 8 тамызда Ақтауда өткен «Caspian Clean Challenge» халықаралық экологиялық марафоны. Оған экология және табиғи ресурстар вице-министрі Мансұр Ошурбаев қатысты. Волонтерлер плоггинг форматында жағалауды ауқымды тазалау жүргізіп, қоқыстарды жинап, сұрыптады, сондай-ақ өңірдің жасыл технологиялары мен экологиялық бастамаларымен танысты.
Сол күні Ақтауда «Каспий өңірі волонтерлерінің достық аллеясы» ашылды, онда 80-нен астам ағаш отырғызылып, болашақ ұрпаққа арналған үндеулер салынған уақыт капсуласы қаланды.
9 тамызда Бозжыра шатқалында «Bozzhyra Clean Up» акциясы өтті. Қатысушылар Маңғыстаудың бірегей табиғи ландшафттарымен танысып, шатқал аумағында экологиялық сенбілік өткізді.
10-11 тамызда «Caspian Innovation Lab» халықаралық хакатоны өтті, оның аясында қатысушылар Каспий өңірінің экожүйесін сақтау бойынша жобаларды әзірлеп, сарапшыларға таныстырды. Хакатонмен қатар TED форматында ашық микрофон өтті, онда эковолонтерлер мен сарапшылар тәжірибе алмасып, өзекті экологиялық мәселелерді талқылады.
Апталықтың қорытынды іс-шарасы 12 тамызда өткен «Caspian Talks» халықаралық волонтерлер саммиті болды. Ол волонтерлік қозғалыс пен сарапшылар қауымдастығының өкілдерін біріктірді. Саммит аясында хакатон жеңімпаздары марапатталып, тәжірибе алмасу және өңірдің экологиялық сын-қатерлерін талқылау бойынша панельдік сессия өтті. Апталық салтанатты жабылу рәсімімен аяқталды.