Қазақстанда медициналық қызметтерге қосылған құн салығын (ҚҚС) толық алып тастау мүмкіндігі талқылануда. Мұндай бастамамен «Атамекен» Ұлттық кәсіпкерлер палатасының басқарма төрағасы Қанат Шарлапаев шығып, барлық дәрілік заттар мен медициналық бұйымдарға бірыңғай 5% ҚҚС мөлшерлемесін белгілеуді, ал медициналық қызметтерді салықтан толық босатуды ұсынды, деп хабарлайды infohub.kz сайты.
Бұл мәселе жаңа Салық кодексін енгізу жөніндегі жобалық кеңсенің отырысында қаралды. Шарлапаевтың айтуынша, Экономикалық ынтымақтастық және даму ұйымына (ЭЫДҰ) мүше елдердің көпшілігінде медициналық қызметтер ҚҚС-қа жатпайды. Бизнес-қоғамдастық саланы салық салудың әртүрлі нұсқаларын талқылағаннан кейін осындай ұсыныс жасады.
Қазіргі уақытта жаңа Салық кодексі денсаулық сақтау саласындағы ҚҚС мөлшерлемелерін кезең-кезеңмен өзгертуді көздейді. Медициналық қызметтер мен дәрілік заттар, тегін медициналық көмектің кепілдік көлемі (ТМККК) және міндетті әлеуметтік медициналық сақтандыру (МӘМС) жүйесі аясында көрсетілетіндер салықтан толық босатылған. Жеңілдік 3 мыңнан астам дәрілік препарат атауына қолданылады.
Сонымен қатар, сирек кездесетін және әлеуметтік маңызы бар ауруларды диагностикалау, емдеу, алдын алу және оңалту бойынша медициналық қызметтерге ҚҚС салынбайды. Сондай-ақ ТМККК және МӘМС аясында препараттар өндіру үшін қолданылатын фармацевтикалық субстанциялардың импорты салықтан босатылған.
Қалған дәрілер мен медициналық бұйымдар үшін жеңілдікті ҚҚС мөлшерлемесі қолданылады: 2026 жылдың қаңтарынан бастап ол 5% құрайды, ал 2027 жылдың 1 қаңтарынан бастап 10%-ға дейін өсуі тиіс.
Отырыста әртүрлі мөлшерлемелерді қолдану әкімшілендіруді қиындататыны атап өтілді. Сондықтан сала өкілдері дәрілік заттар мен медициналық бұйымдарға бірыңғай мөлшерлеме енгізу мәселесін бірнеше рет көтерген.
Талқылауға қатысушылар пандемия кезіндегі тәжірибе салықтан босатудың өзі медициналық қызметтердің, дәрілер мен медициналық бұйымдардың құнына әсер етпейтінін көрсеткенін атап өтті. Сондықтан салық режиміндегі кез келген өзгерістер олардың бюджетке, нарыққа және халық үшін медициналық көмектің қолжетімділігіне әсерін қосымша бағалауды талап етеді.
Отырыс қорытындысы бойынша тараптар ықтимал салдарларды егжей-тегжейлі талдағаннан кейін бұл мәселеге қайта оралуды ұйғарды.