Қазақстанда жылдар бойы сапасыз жолдар ережедегі олқылыққа байланысты қабылданып келген: енді жол жұмыстарын ақаулары жойылмай тұрып қабылдауға мүмкіндік берген нормалар күшін жойды, деп хабарлайды infohub.kz сайты.
Бұрын мердігер жөндеу жасаудың орнына жұмыс құнын төмендетуі, ақшаның бір бөлігін ұстап қалуы немесе кепілдік мерзімін ұзартуы мүмкін еді. Бас көлік прокуратурасының мәліметінше, бұзушылықтар автомобиль жолдарының құрылысын, сапасын бақылауды және қабылдауын реттейтін құжаттарды тексеру кезінде анықталды. Прокуратураның Жол активтерінің ұлттық сапа орталығы қолданған әдістемеге қатысты наразылығы туындады.
«Жекелеген ақаулар анықталған кезде жол жабынының нормативтік сипаттамаларын қалпына келтірмей-ақ жұмысты қабылдауға жол берілді. Кемшіліктерді жоюдың орнына ақшалай қаражатты ұстап қалу, орындалған жұмыстардың құнын төмендету не кепілдік мерзімін ұзарту көзделген», — деп хабарлады прокуратурада.
Онда қаржылық санкциялар мердігерлерге анықталған кемшіліктерді жоймауға мүмкіндік беріп, жолдардың техникалық талаптарға сәйкестігін қамтамасыз етпейтінін атап өтті.
Сонымен қатар, әдістеме сәйкессіздіктер анықталғаннан кейін жобалық шешімдерді қайта қарауға мүмкіндік берді. Прокуратурада бекітілген жобалық құжаттаманы заңда белгіленген тәртіппен ғана өзгертуге болатынын атап көрсетті.
Бас көлік прокуратурасының наразылығынан кейін Көлік министрлігінің бұйрығынан жол жұмыстарын ақаулары жойылмай тұрып қабылдауға мүмкіндік берген нормалар алынып тасталды.