Әл-Фараби атындағы Қазақ ұлттық университетінің студенттері Kazakh Tourism Development Ltd. атқарушы директоры Ержан Еркінбаевпен кездесу ұйымдастырып, Almaty SuperSki жобасы мен Көк-Жайлау аумағын дамыту жоспарларын талқылады. Бұл туралы infohub.kz сайты хабарлайды.
Кездесуге қатысушыларды ең алдымен Көк-Жайлауда қандай инфрақұрылым салынатыны, жобаның табиғи аумаққа және алматылықтардың тауға қатынау мүмкіндігіне қалай әсер ететіні, сондай-ақ туристік ағынды қалай реттеу жоспарланып отырғаны қызықтырды.
Ержан Еркінбаевтың айтуынша, бүгінде жоба төңірегінде түрлі пікір айтылып жүр, сондықтан компания студенттермен тікелей талқылауға және туындаған сұрақтарға жауап беруге дайын.
«Бұл кездесуге бізді студенттердің өздері шақырды. Мен үшін бұл — жастардың Көк-Жайлау төңірегінде болып жатқан жағдайға бей-жай қарамайтынының маңызды көрсеткіші. Almaty SuperSki жобасы жөнінде түрлі пікір айтылып жүр, ал анықтаудың ең тиімді жолы — тікелей сөйлесу», — деді ол.
Талқылауға сондай-ақ Альпинизм және скалолазание федерациясының президенті Нұрсұлтан Шоқанов, ҚазҰУ-дың ботаника және агроэкология кафедрасының меңгерушісі, биология ғылымдарының кандидаты Нұрсұлу Ахтаева, қоғам өкілдері мен студенттер қатысты.
Шоқанов тау аумағын дамыту кезінде қала тұрғындарына қолайлылық басты қағидаттардың бірі болып қалуы керегін атап өтті.
Қатысушылар жобаның экологиялық құрамдас бөлігін де жеке талқылады. Нұрсұлу Ахтаеваның айтуынша, ғалымдар аумақты зерттеуді жалғастырып жатыр. Ол алдын ала нәтижелерге сәйкес Almaty SuperSki жобасының Көк-Жайлау экожүйесіне теріс әсері жоқ екенін мәлімдеді.
Тағы бір тақырып — жұмыспен қамту болды. Студенттер жоба іске қосылғаннан кейін қандай мамандар қажет болатынын және алматылық жоғары оқу орындарының түлектері тау туризмі, экология, инженерия және сервис салаларында жұмыс істей алатынын сұрады.
Еркінбаев жобаға түрлі бағыттағы мамандар, соның ішінде жас түлектер де қажет болатынын айтты.
«Біз үшін Almaty SuperSki жобасының дамуы тек туристерге ғана емес, алматылықтардың өздеріне де мүмкіндік туғызғаны маңызды. Оның ішінде бүгінде университеттерде оқып жатқан жас мамандарға да», — деді ол.
Студенттердің өздері бұл бастаманы Көк-Жайлау туралы ақпаратты әлеуметтік желілердегі талқылаулардан емес, жоба өкілдерінен тікелей алу ниетімен түсіндірді.
«Біз үшін Көк-Жайлау — картадағы дерексіз аумақ емес. Біз онда жиі боламыз, бұл жерді жақсы білеміз, сондықтан Almaty SuperSki жобасы жүзеге асқаннан кейін оның қандай болатынын түсінгіміз келеді. Сонымен қатар жоба болашақта бізге жас маман ретінде қандай мүмкіндіктер беретінін білу де қызық», — деді кездесуге қатысушылардың бірі.
Пікірталас барысында жастар Алматы тауларының алдағы жылдары қалай дамуы керегі туралы мәселені де көтерді. Көк-Жайлау серуендеу мен демалыс үшін танымал орын болып қала бергендіктен, аумақты өзгерту жоспарлары қала тұрғындарының қызығушылығын туғызып отыр.
Кездесуді ұйымдастырған студенттер JANA LEP қоғамдық қозғалысының да бастамашылары болды. Оның қатысушылары жастар мен белсенді тұрғындарды Алматының болашағын талқылау төңірегінде біріктіруді мақсат ететіндерін мәлімдеді.