Көкшетауда 23 жастағы жергілікті тұрғын Mercedes-Benz көлігін жалпыға ортақ жолда дрифт жасап, әкімшілік жауапкершілікке тартылды. Тәртіп бұзушылық профилактикалық іс-шаралар барысында анықталды. Бұл туралы Ақмола облысы полиция департаменті хабарлады, деп жазады infohub.kz сайты.
Полицияның мәліметінше, жүргізуші жолды бүлдіргені және маневр жасау ережелерін бұзғаны үшін жазаланды. Оған 7 айлық есептік көрсеткіш мөлшерінде — 30 мың теңгеден астам әкімшілік айыппұл салынды. Сонымен қатар бұзушымен профилактикалық әңгіме жүргізілді.
Облыстық полиция департаменті жыл басынан бері дрифт жасағаны үшін 24 жүргізуші әкімшілік жауапкершілікке тартылғанын қосты.
Автокөлік әуесқойларына ескертілді: «Қала жолындағы дрифт тек сырттан қарағанда әсерлі көрінуі мүмкін. Іс жүзінде мұндай маневрлер нақты қауіп төндіреді. Көлік басқарудан шығып, қарсы жолаққа шығып кетуі немесе басқа қозғалыс қатысушыларымен соқтығысуы ықтимал. Жаяу жүргіншілер мен басқа көліктер жақын жерде орналасқан тұстарда мұндай жағдайлар әсіресе қауіпті».