Қазақстанда микроқаржы ұйымы лицензиясынан айырылса, берген кредиттері автоматты түрде есептен шығарылмайды. Бұл жағдайда қарыз алушылар қарызын қалай өтеуі керек? infohub.kz сайты хабарлайды.

Микроқаржы ұйымы қызметін жүргізуге лицензиясынан айырылған жағдайлар болады. Алайда Қазақстан Республикасының Қаржы нарығын реттеу және дамыту агенттігінің мәліметінше, микроқаржы ұйымының таратылуы немесе банкроттығы берілген кредиттердің автоматты түрде есептен шығарылуын білдірмейді.

Банктердегідей, қарыз алушылар алынған ақшаны қайтарып, сыйақыны төлеуге міндетті.

Өтеу тәртібі талап ету құқығының басқа кредиторға берілген-берілмегеніне байланысты.

Егер талап ету құқығы берілмесе, қарыз алушы шарт талаптарына және онда көрсетілген деректемелерге сәйкес қарызын төлеуді жалғастырады.

Егер берешек басқа қаржы ұйымына немесе коллекторлық агенттікке беріліп, төлем деректемелері өзгерсе, қарыз алушыға кредитордың ауысқаны және қарызды өтеу тәртібі туралы тиісті түрде хабарлау қажет.

Қиындықтарға тап болмас үшін микроқаржы ұйымының жабылғаны немесе лицензиясының қайтарып алынғаны туралы ақпаратқа байланысты төлемді тоқтатуға болмайды. Төлем жасамас бұрын талап ету құқығы кімге тиесілі екенін және қандай деректемелердің өзекті екенін тексеру қажет.

Микроқаржы ұйымының лицензиясы заңнаманы жүйелі түрде бұзғаны, сондай-ақ пруденциалдық және басқа да нормативтерді сақтамағаны үшін тоқтатылуы немесе қайтарып алынуы мүмкін.

2026 жылғы 1 қыркүйектегі жағдай бойынша Қазақстанда 217 микроқаржы ұйымы жұмыс істеген. Жыл басынан бері 8 микроқаржы ұйымының лицензиясы қайтарып алынып, тағы екеуінің лицензиясының қолданылуы тоқтатылды.

Сондықтан микрокредит рәсімдеу алдында ұйымның микроқаржылық қызметті жүзеге асыруға жарамды лицензиясы бар екеніне көз жеткізу қажет. Оның бар-жоғын ресми тізілімнен тексеруге болады.

Сондай-ақ, микроқаржы ұйымымен мәселелер, даулар немесе жанжалдар туындаған жағдайда қазақстандықтар микроқаржы омбудсманына көмек сұрап жүгіне алады. Оның қызметтері азаматтар үшін тегін, ал шешімдері орындалуға міндетті.

Ал бұған дейін біз кредит берген банк лицензиясынан айырылса, бүкіл кредитті бірден жабу керек пе деген сұраққа жауап берген болатынбыз.