2026 жылдың соңына дейін ерекше қажеттіліктері бар балаларды үй жағдайында оңалту пилоттық жобасы Қазақстанның тағы төрт өңірін қамтиды. Қазір ол Шымкентте, Қызылорда, Павлодар облыстарында және Абай облысында жұмыс істеп тұр, деп хабарлайды infohub.kz сайты.
Еңбек және халықты әлеуметтік қорғау министрлігінің мәліметінше, бүгінде осы өңірлерде 642 бала үйде кешенді оңалтудан өтіп жатыр, олардың 500-інде оң динамика байқалған.
«QH Мүгедек балаларды үйде оңалту» жобасы тағы төрт өңірге кеңейтілетіні хабарланды, алайда нақты қандай облыстар екені айтылмады.
Еске салайық, мүгедек балаларды үйде оңалту елдің төрт өңірінде 2024 жылы енгізілген болатын. Бас мақсат – баланың үйдегі әдеттегі жағдайда, мамандардың сүйемелдеуімен қажетті оңалту курсынан өтуі.
Барлығы қалай ұйымдастырылған: жоба аясында алдымен мамандар балалардың жағдайын, олардың жеке қажеттіліктерін, сондай-ақ тұрмыс жағдайын бағалайды. Содан кейін бейімделгіш креслолар, вертикализаторлар, ходунки және әртүрлі жаттығу құрылғылары болуы мүмкін техникалық оңалту құралдары таңдалады. Барлық қажетті жабдықты баланың үйіне тікелей жеткізіп, уақытша пайдалануға береді.
«Ата-аналарға техникалық құралдарды қауіпсіз пайдалануға және қажетті жаттығуларды орындауға үйретеді. Курстың ұзақтығы мен мазмұны әр жағдайда жеке анықталады», – делінген хабарламада.
Жобаның нәтижелері қандай: кішкентай пациенттердегі оң динамика нақты өзгерістер бойынша бағаланатыны атап өтіледі. Ол үшін Бартел, FIM және УНОДН шкалалары қолданылады. Сонымен қатар, баланың басын жақсы ұстауды үйренгені, өздігінен отыруы немесе тұруы, аяққа тұруы, жүру дағдыларының жақсарғаны ескеріледі.
Еңбек министрлігінде жоба басталғалы 138 бала басын жақсы ұстай бастағанын, 83-і өздігінен отыратынын, 49-ы қолдаумен жүретінін, тағы 35 бала өздігінен жүре бастағанын атап өтті.