2026 жылғы әдебиет саласындағы Нобель сыйлығы канадалық жазушы Энн Карсонға берілді. Нобель комитетінің мәлімдеуінше, сыйлық «классикалық дәстүрмен ойнақы сұхбаттасып, заманауи әдебиеттің жаңа формаларын жасаған батыл және өнертапқыш шығармашылығы үшін» табыс етілді, деп хабарлайды infohub.kz сайты.
Энн Карсон — ақын, жазушы, аудармашы және антикалық әдебиетті зерттеуші. Мансабы бойы ол өлең жазумен қатар аудармашылықпен айналысып, түрлі университеттерде сабақ берді. Оның барлық дерлік әдеби шығармалары филологтың сөздерге деген құмарлығы мен ақынның жаңа мағыналарға ұмтылысының тоғысуына арналған. Ол өзі сөздердің этимологиясын бүкіл шығармашылығының бастау нүктесі ретінде анықтаған.
Deutsche Welle ақпараты бойынша, Энн Карсон 1950 жылы Торонто қаласында дүниеге келген. Ол мектеп кезінен ежелгі грек тіліне қызығып, кейін Торонто университетінде антикалық әдебиетті оқып, 1981 жылы докторлық дәреже алды. Канада мен АҚШ университеттерінде, соның ішінде Принстон мен Мичиган университетінде сабақ берді.
Карсон әдеби жанрлар шегіндегі эксперименттерімен танымал: оның шығармаларында ежелгі грек мифтері заманауи поэзиямен, философиялық эсселермен және визуалды өнермен ұштасады. Жазушы Сапфо, Еврипид және Софоклды аударған, ал ежелгі грек мифтері арқылы заманауи махаббат, сексуалдық, жалғыздық және жоғалту туралы сөйлеген.
Оған халықаралық мойындауды өлеңмен жазылған «Қызылдың автобиографиясы» (1998) романы әкелді. Энн Карсон көптеген әдеби марапаттарға ие болды. 2000 жылы ол ерекше шығармашылық жетістіктері үшін берілетін Макартур қорының стипендиясын (MacArthur Fellowship) алды. 2001 жылы оның «Күйеуінің сұлулығы» кітабы британдық Т. С. Элиот атындағы поэзия сыйлығымен марапатталды.
Бұған дейін 2026 жылғы физиология немесе медицина саласындағы Нобель сыйлығы оптогенетиканың пайда болуына әкелген ашылулар жасаған ғалымдарға берілгені хабарланған. Сондай-ақ физика саласындағы Нобель сыйлығының жеңімпазы жарияланды: ол ғарыштағы энергияны бақылайды. Ал химия саласында 2026 жылы сыйлық ғалымдар Анри Каган мен Кэнсо Соаиға «асимметриялық органикалық синтездегі сызықтық емес эффектілер мен автокатализді ашқаны үшін» берілді.