Шымкенттің «Ордабасы» клубында ойнайтын, Норвегия құрамасының бұрынғы шабуылшысы Бьорн Йонсен Қазақстан премьер-лигасының (ҚПЛ) үздік сұрмергені атанды, деп хабарлайды infohub.kz сайты.
34 жастағы форвард 17 матчта 14 гол соғып, екі нәтижелі пас берді. Йонсен ҚПЛ тарихында маусым барысында чемпионатқа ауысып келіп, сұрмергендер жарысын ұтып алған алғашқы футболшы болды. Ол «Ордабасы» құрамын маусымның маусым айында еркін агент ретінде толықтырған болатын.
Маусымда тағы екі легионер-шабуылшы 12 голдан соқты: алматылық «Қайраттан» испаниялық Марк Гуаль және қостанайлық «Тобылдан» сербиялық Урош Милованович. Қазақстандықтар арасында үздік атанғандар — «Ақтөбенің» шабуылшысы Артур Шушеначев пен семейлік «Елімайдың» ойыншысы Роман Муртазаев, олардың екеуінің де еншісінде он голдан бар.
Ассистенттер тізімінде «Астананың» қазақстандық жартылай қорғаушысы Бауыржан Исламхан мен «Ақтөбенің» аргентиналық хавбегі Агустин Пасторица көш бастады. Олардың әрқайсысы тоғыз нәтижелі пас берген.
Қақпашылар арасында ең көп «құрғақ» матч өткізген — «Қайраттың» қазақстандық қақпашысы Темірлан Анарбеков, ол 14 матчта қақпасын таза ұстады. Сейв саны бойынша көкшетаулық «Оқжетпестің» ресейлік қақпашысы Мирослав Лобанцев көш бастады — 107 сейв.
Орташа көрермен саны бойынша үздік нәтижені «Ордабасы» көрсетті — 11 690 көрермен. Үздік үштікте одан кейін «Қайрат» (11 155) пен «Астана» (8 804) орналасты.