Сенбіде, 29 тамызда, Қазақстан Премьер-лигасының 24-туры басталып, төрт матч өтті. Чемпионат көшбасшысы «Ордабасы» «Қызылжарды» ірі есеппен ұтса, «Оқжетпес» «Қайсардан» басым түсті, ал «Ұлытау» мен «Жеңіс» те үш ұпайдан иеленді... деп хабарлайды infohub.kz.
«Ордабасы» өз алаңында «Қызылжарды» 3:0 есебімен сенімді түрде тізе бүктірді. Тоғызыншы минутта-ақ бразилиялық Лео Нател есеп ашты, үзілістен кейін шымкенттіктердің басымдығын гандық Дэвид Абагна арттырды, ал үшінші голды Эвертон соқты. Андрей Мартин шәкірттері 55 ұпай жинап, «Қайраттан» айырмашылығын жеті баллға жеткізді, алайда алматылықтардың екі ойыны қорда тұр.
Күннің ең нәтижелі матчы Қызылордада өтті. «Оқжетпес» 28-минутта-ақ Оралхан Өміртаев пен Нұрғайни Бөрібаевтың голдарымен «Қайсардан» 2:0 есебімен алға шықты. Нұралы Жақсылық алаң иелерінің айырмашылығын қысқартты, ал үзілістен кейін Борис Лотоцкий мен Рамазан Бағдат гол алмасты — қонақтар пайдасына 3:2. Көкшетаулықтар 39 ұпай жинап, үшінші орындағы «Астанамен» теңесті, астаналықтардың екі ойыны қорда.
Жезқазғанда «Ұлытау» «Жетісуды» ірі есеппен ұтты. Талдықорғандықтар бірінші голды өз қақпасына соғып алды — бұрыштамадан кейін Нұрбол Ануарбеков ерекшеленді. Екінші таймда Хироки Харада алаң иелерінің басымдығын еселеді, ал қосымша уақытта Илья Черняк есепті ірілендірді. «Ұлытау» 31 ұпай жинап, жетінші орынға көтерілді, ал «Жетісу» 19 ұпаймен төменгі сатыда қалды.
«Жеңіс» қатарынан екінші рет жеңіске жетті. «Алтай» қақпасына жалғыз голды 67-минутта хорватиялық Андрия Филипович соқты. Сегіз минуттан кейін ол дубль жасай алар еді, бірақ пенальтиді соға алмады. Бұл жеңістен кейін астаналық клуб 29 ұпай жинап, сегізінші орында тұр.
24-тур 30 тамызда «Ертіс» — «Ақтөбе», «Каспий» — «Тобыл» және «Атырау» — «Астана» матчтарымен жалғасады. Турдың орталық ойыны «Елімай» мен «Қайрат» арасында 31 тамызда Семейде өтеді. Жеңіс жағдайында қазіргі чемпион «Ордабасыдан» айырмашылықты қайта қысқарта алады.