Өскемендегі кафелердің бірінде 4 қазанға қараған түні жанжал болып, оның құрбаны 40 жастағы полиция қызметкері болды, деп хабарлайды infohub.kz сайты.
Қайғылы оқиға орнынан түсірілген кадрларды Нalyqstan Telegram-арнасы жариялады. Оның мәліметінше, ер адам қызметтен тыс уақытта осы мекемеде болған. Ол өзін дұрыс ұстамаған келушіге ескерту жасаған. Оған жауап ретінде ол көшеде қуып жетіп, бетінен тепкен.
Алған жарақаттарынан ер адам көз жұмды.
Оқиға туралы алғашында жергілікті пабликтер хабарлады. Сонымен қатар Өскемен тұрғындары 4 қазанда қалада полицияның көліктерді тексеруіне назар аударды. Көліктер, оның ішінде Үлбі көпірінде тоқтатылып, жүргізушілердің құжаттары тексерілді. Әлеуметтік желілерде құқық қорғау органдары жанжалға қатысушыны іздеуі мүмкін деген болжам айтылды.
Кейін Шығыс Қазақстан облысының Полиция департаменті өз қызметкерінің қаза тапқанын растап, күдіктінің ұсталғанын мәлімдеді.
«Болған оқиға бойынша қылмыстық іс қозғалды. Күдікті ұсталып, уақытша ұстау изоляторына қамалды», — деді полицияда.
Ведомство тергеу жалғасып жатқанын, сондықтан тергеу мүддесі үшін өзге мәліметтер жарияланбайтынын нақтылады.
Бұған дейін «Курсив» Алматы облысының тауларында күйіп кеткен денесі табылған 37 жастағы аға жедел уәкіл Аслан Альсеровтің өлтірілуі туралы жазған болатын. Іс бойынша бірнеше адам, оның ішінде қаза тапқан полицейдің әйелі мен ұлы ұсталды.