Петропавлда такси жүргізушісі 73 жастағы зейнеткер әйелді алаяқтардан құтқарып, 2 миллион теңгеден астам қаражатын сақтап қалды, деп хабарлайды infohub.kz сайты.
Солтүстік Қазақстан облысы полиция департаментінің баспасөз қызметі мәлім еткендей, қарт әйелге белгілі бір байланыс қызметін көрсететін компанияның қызметкерімін деп таныстырған бейтаныс адам қоңырау шалған. Ол шарттың мерзімі бітіп қалғанын айтып, оны үйден шықпай-ақ ұзартуды ұсынды: ол үшін SMS-тегі кодты айтып, телефон арқылы шарт талаптарымен келісетінін анық жеткізу қажет болған.
Келесі күні алаяқтар екінші кезеңге көшті — олар қоңырау шалып, осы әрекеттердің салдарынан әйелдің атына 5 миллион теңгеге несие рәсімделгенін сендіре бастады. Осыны түзету үшін депозиттегі барлық жинақты алып, оны «қауіпсіз мемлекеттік шотқа» аудару керек болған.
Алаяқтар зейнеткерге банкке ақша алуға бару үшін таксиді өздері шақырды. Бақытымызға орай, көлік тізгінінде жеке кәсіпкер Виктор Тимофеев болды, ол дәл алдыңғы күні әлеуметтік желілерде интернет-алаяқтыққа қарсы профилактикалық материалдарды қарап шыққан екен. Ол телефонмен үздіксіз нұсқау алып отырған жолаушының алаяқтардың торына түскенін бірден түсінді.
Әйел әуелі оның сөзіне құлақ аспады. Қылмыскерлер оны тоқтатпақ болған адамға сенуге болмайтынын, «бұлардың бәрі бір мафия» екенін қасарыса сендірді. Банкте Виктор менеджерді ықтимал алаяқтық туралы ескертіп, 102-ге қоңырау шалды. Жедел жеткен полицейлер зейнеткерге оның кең тараған алаяқтық схемасының құрбаны болуға шақ қалғанын түсіндірді.
Нәтижесінде зейнеткердің 2 миллион теңгеден астам қаражатын сақтап қалуға мүмкіндік туды.