Әлемнің бірінші ракеткасы Елена Рыбакина АҚШ ашық чемпионатында 2026 жылы жеңіске жеткен соң мансабындағы кезекті басты мақсатын атады. Ол — «Ролан Гарроста» жеңіске жету. Бұл оған «Үлкен дулыға» турнирлерінің төрт титулын да жинауға мүмкіндік береді, деп хабарлайды infohub.kz сайты.
Нью-Йоркте қазақстандық теннисші мансабындағы үшінші мейджорды жеңіп алды. Финалда ол Арина Соболенконы 6:4, 5:7, 6:2 есебімен ұтты. Бұған дейін Рыбакина Уимблдон-2022 мен Australian Open-2026-да топ жарған. Енді төрт басты теннис турнирінің ішінен оған Париждің грунт корттарындағы титул ғана жетіспей тұр.
«Мен үшін бұл бәрін білдірер еді, өйткені әртүрлі жабындыларда төрт «Үлкен дулыға» турнирін де ұтып алу — орасан зор жетістік деп ойлаймын. Мұны қанша адамның бағындырғанын білмеймін, бірақ иә, «Ролан Гаррос» — менің келесі мақсатым. Дәл осы үшін командаммен бірге жұмыс істейміз. Алдағы бірнеше жылда осыған жету үшін қажеттінің бәрін жақсартуға тырысамыз», — деп келтіреді Рыбакинаның сөзін Punto de Break.
Егер Рыбакина «Ролан Гарросты» жеңсе, ол мансабында төрт «Үлкен дулыға» турнирінің әрқайсысында кемінде бір рет жеңіске жеткен теннисшілер қатарына қосылар еді.
Ашық дәуірде мұндай жетістік жеті теннисшіге бағынған: Маргарет Корт, Билли Джин Кинг, Крис Эверт, Мартина Навратилова, Штеффи Граф, Серена Уильямс және Мария Шарапова. Соңғы болып мансаптық «Үлкен дулығаны» Шарапова толықтырды, ол «Ролан Гарросты» алғаш рет 2012 жылы жеңіп алған.
Грунтты мейджорда Рыбакина әзірге ширек финалдан әрі өткен емес. Бұл кезеңге ол екі рет жетті – 2021 және 2024 жылдары. 2021 жылы қазақстандық теннисші мансабында алғаш рет «Үлкен дулыға» турнирінің ширек финалына шығып, жолда Серена Уильямсты ұтты.
Сонымен қатар Рыбакинаның грунтта ірі титулы бар. 2023 жылы ол Римдегі WTA 1000 турнирінің жеңімпазы атанды.
Еске салайық, US Open-2026-дан кейін 27 жастағы Рыбакина алғаш рет WTA рейтингінде көш бастады.