Семейде қарапайым студенттің шотына интернет-алаяқтықтан зардап шеккен 25 адамнан түскен 16 миллион теңгеден астам қаражат түскен. Қаржылық мониторинг агенттігінің мәліметінше, ақша аудару және қолма-қол ақшаға айналдыру үшін жергілікті университеттің алты студентінің банк карталары пайдаланылған — олардың барлығы жауап алуға шақырылды, деп хабарлайды infohub.kz сайты.
Тергеу болжамынша, бұл схеманың артында дропперлерді іздейтін топ тұрған. Дропперлер — алдауға ұшыраған қазақстандықтардың ақшасы аударылып, шешілетін шоттардың иелері. Топтың әрекетін Абай облысы бойынша Қаржылық мониторинг агенттігінің департаменті тоқтатты.
Қаражат студенттердің карталарына түсіп, содан кейін шағын сомалармен басқа шоттарға аударылып, одан соң қолма-қол ақшаға айналдырылған. Агенттіктің түсіндіруінше, бұл «олардың шығу тегін жасыруға, қаржы ағындарын бақылауды қиындатуға» мүмкіндік берген.
Тергеушілер ақшаны Қазақстанның түрлі өңірлеріндегі интернет-алаяқтық істері бойынша зардап шеккендер жібергенін анықтады.
«Олардың географиясы елдің 11 өңірін қамтиды: Абай, Қарағанды, Ақтөбе, Түркістан, Атырау, Батыс Қазақстан, Павлодар, Ақмола, Жамбыл және Алматы облыстары, сондай-ақ Алматы және Шымкент қалалары», — деп хабарлады Қаржылық мониторинг агенттігінде.
Ведомство сонымен қатар тергеу жалғасып жатқанын, істің мән-жайы жария етілмейтінін нақтылады.
Бұған дейін «Курсив» Қазақстанда Мұғалімдер күніне орай алаяқтардың жасанды интеллектпен жаңа афера бастағанын жазған болатын.