Әлемнің бірінші ракеткасы Арина Соболенко АҚШ ашық чемпионатында титулын қорғауды жалғастыруда. Ширек финалда беларусь теннисшісі чехиялық алтыншы ракетка Линда Носкованы 7:6 (7:1), 3:6, 7:6 (10:7) есебімен тізе бүктірді, деп хабарлайды infohub.kz.
Артур Эш атындағы корттағы матч 2 сағат 22 минутқа созылды. Бірінші сет тай-брейкте аяқталып, Соболенко қарсыласына бір ғана ұпай берді — 7:1. Екінші партияда Носкова брейк жасап, сеттер бойынша есепті теңестірді. Айта кетейік, бұған дейін беларусь теннисшісі турнирде бірде-бір сет ұтылмаған еді.
Шешуші партияда қарсыластар қайтадан тай-брейкке жетті, бірақ бұл жолы жеңімпаз он ұпайға дейінгі форматта анықталды. Соболенко басым түсті — 10:7, осылайша жартылай финалға жолдама алды.
Матч статистикасы Носкованың бірінші ракеткадан бірнеше көрсеткіш бойынша озып тұрғанын көрсетеді: чех теннисшісі 18 эйс жасады (Соболенкода 12), 46 виннер (қарсыласында 42) және аз қателік жіберді — 25-ке қарсы 30. Носкова алты брейк-пойнттың үшеуін пайдаланса, Соболенко тоғыздың екеуін ғана іске асырды.
Дегенмен, беларусь теннисшісі екінші подачада айтарлықтай жақсы ойнап, мұндай розыгрыштардың 61 пайызын ұтып алды (қарсыласында 43 пайыз). Жалпы ұпайлар арақатынасы Соболенконың пайдасына 113:105 болды.
Жартылай финалда US Open-тің қазіргі чемпионы Джессика Пегула мен Эмма Наварро арасындағы американдық ширек финал жеңімпазымен кездеседі.
Бұл ретте WTA рейтингінің бірінші сатысына қатысты интрига сақталуда. Екінші орында тұрған Елена Рыбакина ширек финалда Чжэн Циньвэньмен ойнайды. Егер қазақстандық теннисші жеңіске жетіп, жартылай финалға шықса, ол Соболенконың US Open-тегі одан әрі нәтижесіне қарамастан, мансабында алғаш рет әлемнің бірінші ракеткасы атанады.