Қазақстандық алтын өндіруші Solidcore Resources Жапониядағы бес учаскеде геологиялық барлауға 25 млн доллар жұмсайды. Бұл шешім канадалық Japan Gold Corp компаниясымен стратегиялық альянс аясында қабылданды. Келешекте Solidcore жекелеген жобалардағы үлесін 80%-ға дейін жеткізе алады, деп хабарлайды infohub.kz сайты.
Компанияның 23 қыркүйектегі хабарламасына сәйкес, Solidcore Хоккайдо мен Кюсю аралдарындағы Japan Gold учаскелерінде үш жылдық геологиялық барлау бағдарламасын қаржыландырады. Бірінші кезең аяқталған соң компания барлау нәтижелеріне қарай бір немесе бірнеше учаскеде 49% үлес ала алады.
Екінші кезеңде Solidcore жобаның алдын ала техникалық-экономикалық негіздемесін дайындауды қаржыландырса, үлесін 70%-ға дейін ұлғайта алады. Банктік техникалық-экономикалық негіздемені қаржыландырғаннан кейін үлесті 80%-ға жеткізуге болады. Шешімдер әр учаске бойынша жеке-жеке қабылданады.
Сонымен қатар Solidcore Japan Gold компаниясының өзіне тағы 6,85 млн доллар инвестициялады. Компания канадалық алтын өндірушінің 78,8 млн бағалы қағазын сатып алып, оның 18,81% жай акциясына ие болды. Сатып алынған варранттар орындалған жағдайда Solidcore үлесі 19,9%-ға дейін өсуі мүмкін.
Сондай-ақ Solidcore Japan Gold компаниясының кемінде 18% үлесіне ие болғанша, оның директорлар кеңесіне екі мүше тағайындау құқығын алды. Кеңес құрамына Solidcore кеңесшісі Виктор Флорес пен комплаенс және корпоративтік басқару жөніндегі атқарушы вице-президент Татьяна Чедаева кірді.
Альянсқа бес учаске — Hakuryu, Bajo, Mizobe, Ryuo және Aibetsu кірді. Олар тарихи алтын өндірілген аудандарда орналасқан. Атап айтқанда, Mizobe учаскесінің геологиялық құрылымы Japan Gold ресурсын 13 млн унция алтын деп бағалаған Hishikari кен орнына ұқсайды.
Japan Gold — Жапонияда жұмыс істейтін канадалық геологиялық барлау компаниясы. Оның геологиялық барлау құқықтарының портфелі 3 мың шаршы км-ден асады. Solidcore «Астана» халықаралық қаржы орталығында тіркеліп, AIX биржасында саудаланады. Компания Қазақстанда екі жұмыс істеп тұрған алтын өндіру кәсіпорнын және Ertis POX жобасын басқарады.
Бұған дейін Solidcore акционерлерге өз акцияларын кері сатып алу арқылы 1,2 млрд долларға дейін қайтару ниетін жариялаған. Компания 102,9 млн бағалы қағазды, яғни акционерлік капиталдың шамамен 23,2%-ын, бір акциясы 11,66 доллардан сатып алуды жоспарлап отыр. Өтінімдер 12 қазанға дейін қабылданады, ал кері сатып алу 30 қыркүйектегі жалпы жиналыста акционерлердің мақұлдауын алуы тиіс. 1 қыркүйектегі жағдай бойынша Solidcore қаражаты 1,4 млрд долларды, таза ақшалай позициясы 747 млн долларды құрады.
Сонымен қатар тамызда Solidcore еншілес құрылымы Tin One Mining Солтүстік Қазақстан облысындағы Сырымбет қалайы кен орнында тау-кен байыту комбинатын салу жобасын іске асыру туралы меморандумға қол қойды. Инвестициялардың алдын ала көлемі кемінде 150 млрд теңгеге бағаланады. Жобаны іске асыру Solidcore директорлар кеңесінің мақұлдауына байланысты. Кәсіпорында 800-ге жуық жұмыс орнын ашу жоспарлануда.