Қазақстанда студенттік жатақханаларға орналастыруда әлеуметтік осал топтарға басымдық беріледі. Бұл туралы Жоғары және жоғары оқу орнынан кейінгі білім комитеті төрағасының орынбасары Әкерке Абылайхан мәлімдеді, деп хабарлайды infohub.kz сайты.
Оның айтуынша, республикада 281 жатақхана пайдалануға берілген, олардың сыйымдылығы 72 125 орынды құрайды. Оның ішінде 182-сі жоғары оқу орындарының студенттеріне арналған — бұл 51 323 орын.
Ең алдымен, ата-анасының қамқорлығынсыз қалған студенттерге, мүгедектігі бар адамдарға, көпбалалы және аз қамтылған отбасылардың өкілдеріне, ауыл жастарына, сондай-ақ «Серпін» жобасының қатысушылары мен қандастарға орын беріледі. Сонымен қатар, бұл тізімге студенттердің басқа да әлеуметтік осал санаттары кіреді.
Орналастыруға байланысты мәселелерді жедел шешу үшін министрлік ситуациялық және дағдарыс орталықтарын ашты. Ситуациялық орталық Қазақ ұлттық қыздар педагогикалық университетінің базасында, ал дағдарыс орталығы Тынышбаев университетінің базасында жұмыс істейді. Абылайханның түсіндіруінше, ситуациялық орталық студенттерді жатақханалардағы бос орындар туралы хабардар етеді, ал дағдарыс орталығы форс-мажорлық жағдайларда уақытша тұрғын үймен қамтамасыз етуге көмектеседі.
Сондай-ақ, еліміздің әрбір өңірінде студенттер үшін омбудсмендер тағайындалды.
Бұдан басқа, 2023 жылдың 1 қыркүйегінен бастап жетім балалар санатындағы студенттер, сондай-ақ I және II топтағы мүгедектігі бар адамдар мен бала кезінен мүгедектер жатақханада тұрған жағдайда 29 АЕК (100 мың теңге) мөлшерінде өтемақы алуға құқылы.
Бұған дейін «Курсив» Астанадағы «киберспорт» университетінің жатақханасы әлеуметтік желілерде таңданыс тудырғанын жазған болатын.