2026 жылғы тамызда Қазақстан банктері 213,4 млрд теңге таза пайда тапты. Бұл өткен айдың нәтижесінен 6%-ға артық. Табыс көлемі бойынша Halyk Bank пен Kaspi Bank көш бастап тұр, ал ең пайдалы бестікке ForteBank қайта оралды. Мұндай деректі Ұлттық банк жариялады, деп хабарлайды infohub.kz сайты.
Айлық пайда көлемі бойынша бірінші орынды Halyk Bank ұстап отыр. Тамызда банк 76,2 млрд теңге тапты, бұл шілдедегі нәтижеден 1%-ға, яғни 0,6 млрд теңгеге көп. Halyk-тің жыл басынан бергі таза пайдасы 615,3 млрд теңгеге жетті.
Екінші орында Kaspi Bank қалды: тамыздағы таза пайдасы 41,8 млрд теңге. Шілдемен салыстырғанда көрсеткіш 2%-ға, яғни 0,6 млрд теңгеге өсті. 2026 жылдың басынан бері банк 309,8 млрд теңге тапты.
Үшінші сатыны Банк ЦентрКредит сақтап қалды. Оның айлық таза пайдасы 19%-ға — 16,4 млрд теңгеден 19,5 млрд теңгеге дейін өсті. БЦК-нің сегіз айдағы жиынтық нәтижесі 142,5 млрд теңгеге жетті.
Төртінші орынды Отбасы банк алды: тамызда ол 15 млрд теңге таза пайда тапты. Бұл шілдеге қарағанда 10%-ға, яғни 1,4 млрд теңгеге көп. Жыл басынан бері банктің пайдасы 115 млрд теңге болды.
Ең басты өзгеріс бесінші орында болды. Шілдеде ең пайдалы бестіктен шығып, орнын Freedom Bank-ке берген ForteBank қайта оралды. Тамызда Forte 13,6 млрд теңге тапты, ал бір ай бұрын бұл көрсеткіш 4,8 млрд теңге еді. Осылайша, банктің айлық пайдасы 183%-ға, яғни 8,8 млрд теңгеге өсті. Жыл басынан бері Forte 87,4 млрд теңге таза пайда алды.
Тамызда алғашқы бестіктің артында Ситибанк — 9,5 млрд теңге, Alatau City Bank — 6,1 млрд теңге, Home Credit Bank — 4,1 млрд теңге, Bank RBK — 4 млрд теңге және ВТБ — 3,5 млрд теңге пайдамен тұр.
Шілдеде көшбасшылар бестігі былай көрінген: Halyk Bank — 75,6 млрд теңге, Kaspi Bank — 41,2 млрд теңге, Банк ЦентрКредит — 16,4 млрд теңге, Отбасы банк — 13,6 млрд теңге, Freedom Bank — 9,6 млрд теңге.