Еуропалық футбол қауымдастықтары одағының (УЕФА) атқару комитеті 2028 жылғы УЕФА Суперкубогін өткізетін орын ретінде «Астана Аренаны» таңдады. Шешім 15 қыркүйекте Салоникиде өткен атқару комитетінің отырысында қабылданды. Қазақстан тарихта алғаш рет осы кубок үшін өтетін матчты қабылдайды, деп хабарлайды infohub.kz сайты.
Айта кетейік, 2027 жылы кездесу Амстердамдағы «Йохан Кройф Аренада» өтеді, ал бір жылдан кейін кубок Қазақстан астанасында сарапқа салынады.
Суперкубок дәстүрлі түрде еуропалық клубтық турнирлердің жаңа маусымын ашады. Бір матчта өткен маусымның Чемпиондар лигасы мен Еуропа лигасының жеңімпаздары кездеседі. 2013 жылдан бастап кездесу орны жыл сайын ауысып отырады.
УЕФА Суперкубогі-2028дің нақты күні әзірге жарияланған жоқ.
УЕФА атқару комитетінің отырысында басқа да еуропалық финалдардың иелері анықталды. Чемпиондар лигасының 2028 жылғы финалы Мюнхенде өтеді, ал 2029 жылы шешуші матчты Барселонадағы «Камп Ноу» қабылдайды. Еуропа лигасының финалдары осы жылдары сәйкесінше Бухарест пен Белградта өтеді.
«Астана Арена» 2009 жылы ашылған және шамамен 30 мың көрерменді сыйдырады. Стадион жылжымалы шатырмен жабдықталған, «Астана» футбол клубының үй аренасы саналады, сондай-ақ Қазақстан құрамасының матчтарын қабылдайды. Онда Чемпиондар лигасы мен Еуропа лигасының кездесулері бірнеше рет өткен.
Соңғы УЕФА Суперкубогі 2026 жылдың тамызында Зальцбургте өтті. «ПСЖ» «Астон Вилланы» 2:1 есебімен жеңіп, кубокты екінші жыл қатарынан иеленді.