Қазақстанда пайдаланудан шыққан көліктерді қайта өңдеу бағдарламасын қайта бастауға дайындық жүріп жатыр, деп хабарлайды infohub.kz сайты.
Ескі көлік иелері оларды қайта өңдеушілерге тапсырып, Қазақстанда шығарылған экологиялық таза көлік сатып алуға жеңілдік сертификатын ала алады.
Экология және табиғи ресурстар министрлігінде хабарлағандай, бағдарлама екі кезеңмен жүзеге асырылады: қайта өңдеуші кәсіпорындармен келісімшарт жасасу және көлік пен ауыл шаруашылығы техникасын қайта өңдеуге өтінімдерді қабылдау және қарау. Көлік қабылдаудың нақты мерзімі әзірге белгісіз. Алдымен «Жасыл даму» қайта өңдеушілерді анықтап, олармен тиісті келісімшарттар жасасуы керек. Одан кейін қабылдау пункттерінің тізімі пайда болады.
Көлікті қайта өңдеуге тапсырғаннан кейін автокөлік иесіне жеңілдік сертификаты беріледі. Жеңілдік мөлшерін индустрияландыру саласындағы уәкілетті мемлекеттік орган анықтайды. Сертификат берілген күннен бастап бір жыл бойы жарамды болады. Сонымен қатар, иесі сертификатты басқа адамға бере алады — бірақ үш реттен көп емес. Бір көлік сатып алуға екі сертификатқа дейін, ал ауыл шаруашылығы техникасын сатып алуға төрт сертификатқа дейін пайдалануға болады. Жеңілдік сертификаттары қайта өңдеу алымы қаражаты есебінен қаржыландырылады.
Бағдарламаға қара металды қайта өңдеумен айналысатын кәсіпорындар қатыса алады. Бұл ретте қайта өңдеуден кейінгі қалдықтардың үлесі қабылданған көліктер массасының 5 пайызынан аспауы тиіс. Сондай-ақ, қазір қайта өңдеуші кәсіпорындар жоқ өңірлерде қосымша қабылдау пункттерін ашу көзделуде.
Алдыңғы қайта өңдеу бағдарламасы 2016 жылдан 2022 жылдың қаңтарына дейін жұмыс істеді. Осы уақыт ішінде Қазақстанда 219 мыңға жуық көлік құралы қабылданды, оның ішінде 215,4 мың автомобиль және 3,5 мың ауыл шаруашылығы техникасы.