Жапония қабылдап отырған 2026 жылғы жазғы Азия ойындарында Қазақстан бокс құрамасы тағы бір шығынға ұшырады: Виктория Графеева 60 келіге дейінгі салмақ дәрежесіндегі өнерін аяқтады, деп хабарлайды infohub.kz сайты.
1/8 финалда қазақстандық спортшы Қытай Тайбэйінен келген Линь Юйтинмен жұдырықтасты. Қарсыласы — Париж-2024 Олимпиадасының чемпионы әрі Ханчжоудағы Азиада-2022 жеңімпазы. Екеуі үшін де бұл қазіргі жарыстағы алғашқы жекпе-жек болды.
Тартыс үш раундқа созылды. Алғашқы екі раундта төрешілердің көбі Юйтинге басымдық берді, алайда екінші раундта одан бір ұпай айыппұл түрінде алынды. Үшінші раундта басымдық Графеева жағында болды.
Жалпы есепте қазақстандық екі төрешінің карточкасында басым түсті. Тағы үш төрешіде алынған ұпайды ескергенде теңдік болғанымен, олардың әрқайсысы Юйтин жағында болды. Осылайша, Қытай Тайбэйінің өкілі төрешілердің бөлек шешімімен 3:2 есебімен жеңіске жетіп, ширек финалға шықты.
Ал Графеева Азиада-2026-дағы өнерін аяқтады. Бұл — Назым Қызайбайдан (54 келіге дейін) кейінгі әйелдер бокс құрамасындағы екінші шығын. Ерлер командасында жарыстан Сабыржан Аққалықов (80 келіге дейін) пен Оразбек Асылқұлов (60 келіге дейін) да шығып қалған.