Қазақстан әйелдер волейбол құрамасы Жапониядағы Азия ойындарындағы өнерін төртінші жеңіліспен тәмамдады. Қытай, Оңтүстік Корея және Қытай Тайбэйі командаларынан кейін қазақстандықтар жетінші орын үшін матчта бір сағаттан сәл астам уақыт ішінде Вьетнамға есе жіберді — 0:3 (21:25, 19:25, 15:25), деп хабарлайды infohub.kz сайты.
Маусымда Филиппинде өткен Азия ұлттары кубогында Асқар Шалқибеков шәкірттері вьетнамдықтарды топтық кезеңде 3:2 есебімен ұтқан еді, алайда қола жүлде үшін таласта оларға 0:3 есебімен жол берді.
Бұл жолы да қазақстандықтар Вьетнамды тізе бүктіре алмады. Біздің волейболшылардың ойынындағы жарқын тұстар көптеген қателіктермен алмасып жатты. Шешуші сәттерде Қазақстан құрамасы қарсыластарына үнемі жол беріп отырды, бұл қорытынды нәтижеден де көрініс тапты.
Бастапқы ойында Филиппинды жеңу қазақстандық команда үшін турнирдегі жалғыз жеңіс болып қалды. Вьетнамға есе жіберіп, Қазақстан құрамасы қатарынан екінші Азиаданы сегізінші орынмен аяқтады. Біздің волейболшылардың құрлықтық ойындардағы ең үздік нәтижесі әлі күнге Гуанчжоудағы Азиада-2010-ның қоласы болып тұр.
АЗИЯ ОЙЫНДАРЫ-2026. Волейбол. Әйелдер. 22 қыркүйек. 7-орын үшін матч. ҚАЗАҚСТАН – ВЬЕТНАМ 0:3.
Азиада-2026-ның алтын медалін бүгін Жапония мен Қытай сарапқа салады. Қола жүлде үшін Оңтүстік Корея мен Таиланд таласады.
Ойындардың ресми ашылуы 19 қыркүйекте өтті. 45 елдің спортшылары қатысатын кешенді жарыстарда 460 медаль жиынтығы сарапқа салынады: 217-сі — ерлер арасында, 204-і — әйелдер арасында және 39-ы — аралас разрядтарда. Азиада-2026-да Қазақстан құрамасының сапында 35 спорт түрінен 558 спортшы өнер көрсетеді.
Ойындардың бірінші күні қазақстандықтар төрт алтын медаль жеңіп алды. Ойындар чемпиондары атанғандар: велошабандоздар Рината Сұлтанова мен Алексей Луценко, сондай-ақ каратэшілер Жоламан Бигабыл мен Софья Берульцева. Екінші күннен кейін Қазақстан бейресми медаль есебінде төртінші орында тұрды.