Qazaqstandyqtardyń uıaly baılanys munaralary men elektromagnıttik óristerge qatysty alańdaýshylyǵy otandyq mamandardyń arnaıy zertteý júrgizýine sebep boldy. Qazaqstannyń birqatar ǵylymı jáne medısınalyq uıymdarynyń sarapshylary 4G jáne 5G tehnologıalaryna qatysty qorqynyshtardyń qanshalyqty negizdi ekenin tekserý úshin júzdegen jarıalanymdar men sholýlardy zerdeledi, dep habarlaıdy infohub.kz saıty.
Sanıtarlyq-epıdemıologıalyq baqylaý komıtetiniń málimetinshe, sarapshylar meta-taldaýlar men júıeli sholýlardy qosa alǵanda, 250-den astam ǵylymı jarıalanymdy zerttegen.
Nátıjesinde sarapshylar 5G tehnologıalarynyń adam densaýlyǵyna teris áseri týraly nanymdy dálelder tappady. Alaıda bul halyqaralyq elektromagnıttik qaýipsizdik normalary saqtalǵan jaǵdaıda ǵana.
Óz kezeginde Sanıtarlyq-epıdemıologıalyq baqylaý komıteti Qazaqstanda elektromagnıttik óristerdiń deńgeıi sanıtarlyq-gıgıenalyq normatıvtermen retteletinin atap ótti. Bul rette olar jumysshylarǵa kásibı áser etý normatıvterinen tómen belgilenedi jáne aıtarlyqtaı gıgıenalyq qaýipsizdik qoryn qarastyrady.
«Belgilengen talaptar saqtalǵan kezde uıaly baılanys munaralary men 4G jáne 5G jabdyqtarynyń bolýy olardy halyqtyń densaýlyǵyna qaýipti dep sanaýǵa negiz bolmaıdy», – dep atap ótti komıtette.
Komıtet azamattarǵa áleýmettik jelilerdegi habarlamalarǵa emes, ǵylymı jáne resmı derekterge súıenýdi usyndy.
Buǵan deıin «Kýrsıv» 2023–2025 jyldary respýblıkada 2,6 myńnan astam 5G bazalyq stansıasy salynǵanyn jazǵan bolatyn. Nátıjesinde 5G qurylǵylarynyń úlesi 50%-dan asty, al jańa býyn jelisine elimizdegi barlyq data-trafıktiń 30%-y tıesili.
Eske salaıyq, 5G – uıaly baılanystyń besinshi býyny. Ol 4G baılanysyn almastyrady. Jańa jeli sekýndyna 1–2 Gbıt/s jáne odan joǵary jyldamdyqtaǵy ınternetti, sondaı-aq sıgnaldyń tómen kidirisin qamtamasyz etedi.